Mairang, 14: U Syiem jong ka Hima Nongkhlaw u Pa’iem Phrester Manik Syiemlieh ula ïathuh ba ka jingtei ïa ka ïew bun mala ha ïew Langstieh ba la bei tyngka lyngba ka North Eastern Council (NEC) la lah ban pyndep ïa ka bynta kaba nyngkong ha ka jinglut kaba T.13 klur ei ei.
Haba kren ha u nongthoh khubor , u Pa’iem ula ong ba ka don ka jingduna ha kane ka ïew bad kata ka dei ka jaka leit sha bar, na ka liang jong ka kompeni ba pyntrei kila ong ba ha ka DPR don tang kwei ka jaka leit sha bar, hynrei namar ka jingheh ka ïew la phah shna noh sa kawei bad kane kawei ka don ka jingthut.
Na ka liang jong ka hima kala dep ban thoh sha ka NEC ba ka hima ka kloi ban shimti ïa katei ka ïew kaba don ha ïew Langstieh wat la ki don ki jingduna bad mynta ki dang ap ïa ka jubab na ka NEC bad ka hima ka kwah ïa u Dr. Jitendra Singh myntri khynnah ka sorkar pdeng ban wan plie.
ïa kane ka ïew bun mala ha Mairang la ïoh lyngba u u myntri ba dei peit ïa ka DONER ha u snem 2017, ïa kane ka ïew la ai kyrpang khlem da leit lyngba ka sorkar jylla, ka jingmang pisa kala wan beit na ka DONER sha ka NEC ban pyntrei ïa kane ka ïew.
Ha kane ka bynta kaba nyngkong, ki dukan ki don 300 tylli bad yn pynrung ïa kito kiba la shah weng ha ka por ba shna ïa kane ka ïew kiba don 300 tylli ki basa, ha ka bynta kaba ar yn sa sdang ynda la shimti ïa kane ka bynta kaba nyngkong.
Ka pisa ka la dep ban don bad ka NEC ban shna ïa ka bynta kaba ar ïa kaba la dep mang kumba T.15 klur ei ei bad ki dukan kiba don hapoh ïew Langstieh ki don sa 800 tylli bad ynda la dep shna ïa kane bynta ka bar ki 800 tylli ki basa yn sa pynrung ïa ki, namar ka ïew Lagnstieh baroh ki don 1000 tam ki basa.
