Da lade hiar jurip u myntri ka tnad ïalehkai, 6 tarik ai por ban pyndep ïa jingpynkhreh jong ka NEOG

Shillong, Naiwieng 03 : U Myntri ba dei peit ïa ka tnad ïalehkai jong ka sorkar jylla u Bah Banteidor Lyngdoh ha ka sngi Palei u la leit ban jurip ïa ki jaka ban pynkhreh pynlong ïa ki jingïalehkai jong ka 2nd North East Olympic Games 2022 kaban sa sdang naduh ka 10 tarik mynta u Naiwieng.
La synrang lang ha kane ka sngi ki ophisar jong ka tnad ïalehkai, Bah John F Kharshiing Working President ka MSOA, ki nongkitkam ka MFA bad kiwei kiwei. Ha kane ka sngi u Bah Banteidor Lyngdoh u la leit ban jurip ïa ka madan MFA, Third Ground ha Polo kaban sa pynlong ïa ka jingïalehkai phutbol jong ki shynrang bad kynthei, ka jaka ïalehkai tennis, ïa ka madan basketball na bynta ban pynlong ïa ka weighlifting bad wrestling.
U la leit ruh ban jurip ïa ka SAI Training Centre kaba don ha NEHU ïa kaba yn sa pynïalehkai ïa ka Athletics, Archery bad Karate, nalor kata yn pynlong ruh ka jingïalehkai Wushu, Badminton bad Table Tennis.
U Bah Banteidor Lyngdoh haba ïakren bad ki nongthoh khubor u la pynpaw ka jingsngewkmen bad sngewhun ba ka jingpynkhreh ka long kaba ïaid beit ïaid ryntih na bynta ban ïoh pynlong ïa katei ka lympung bah hapoh ka jylla.
“Kum u myntri badei peit ïa ka tnad ïalehkai ngam kwah ba ka jingpynkhreh na bynta katei ka lympung kan dkoh kumta da ka jing-sngewkhia mynta nga la wan ban jurip hi dalade bad nga dap da ka jingsngew-kmen ba ka jingpynkhreh ka la ïaid shaid shaid,” ong u Bah Banteidor.
Khnang ba ki kam kin long kiba ïaid beit ïaid ryntih na ka liang u Myntri u la ong ba ha ka 6 tarik baroh ki jingpynkhreh ki dei ban dep noh.
“Watla nga la sakhi ba ka jingpynkhreh na bynta katei ka lympung ka la ïaid shaid shaid hynrei nga buh por ba la kumno kumno ha ka 6 tarik baroh ki jingpyn-khreh kidei ban dep noh bad nga ngeit skhem kumba ki la trei shaid shaid kumne kin sa lah ban pyndep ha ka por kaba biang,” u la ong.
Ha kajuh ka por u Bah Banteidor u la ong ba ka long ka burom ïa ka jylla ba kan ïoh ban pynlong ïa kat katei ka lympung bah bad kitbok kitrwiang ruh ïa ki nongïalehkai ka jylla ba kin ïoh kheit ïa u soh jong ka jingjop.
“Nga dap da ka jing-sngewkmen bad ka long ruh ka burom ïa ka jylla ba kan ïoh ban pynlong ïa ka 2nd North East Olympic Games bad khamtam ïa ki nongïalehkai kiban sa ïoh ban ïashim bynta ha ki jingïalehkai bapher bapher. Nga kitbok kitrwiang ïa ki nongïalehkai bad ba phin trei shitom khnang ba phin lah ban khur bun tylli ki takma na bynta ka jylla,” la ong u Bah Banteidor Lyngdoh.
Khatduh u Bah Banteidor Lyngdoh u kyntu bad ïawer ïa ki paidbah ban wan peit bad ai mynsiem ïa ki nongïalehkai ka jylla khnang ba ka jylla kan ïoh ka jingjop ba don burom ha katei ka lympung.
Ka lympung ïalehkai 2nd North East Olympic Games 2022 kan sdang ha ka 10 tarik bad kan kut ha ka 16 tarik mynta u Naiwieng 2022.