Mawkyrwat, Naiwieng 03 : Ka Mawkyrwat District Sports Association (MDSA) da ka mynsiem jong ka jingsngewsarong ka la ai ka jingkhublei kyrpang ryngkat ki kyntien jingkitbok kitrwiang namar ka jingïaimih shakhmat jong ki khun samla ban leit sha ki jaka shah hikai pyntbit ha ki kam ïalehkai bapher bapher.
Halor ka jingaikhublei jong ka MDSA ka long hadien ba uwei na ki khun samla jong ka South West Khasi Hills District uba la ju mihkhmat ba leit ïa shimbynta ha ka jingïalehkai siatkhnam ne archery, u samla Amebalaker Wanniang ha kaba mynta u la shah jied ban leit ha kawei ka jaka ban shah pyntbit ha ka jingïasiatkhnam ha ka ‘TATA Archery Academy’ kaba dei ka shlem ai jinghikai ïasiatkhnam kaba paw nam ha ka Ri India kaba don ha ka Jylla Jharkhand.
U samla Amebalaker Wanniang, 15 snem karta u ba dei na ka shnong Mawten, South West Khasi Hills District u khun jong u bah Dasliroy Lyngkhoi bad ka kong Cherryda Wanniang. Une u samla Amebalaker u shong ha ka klas X hapoh ka OM Roy Memorial Higher Secondary School, Mawlai, Shillong.
Ha ka kam ïalehkai, u Amebalaker Wanniang u la sdang nyngkong eh ha Mawkyrwat hapoh ka jingpynbeit jong ka ophis jong u District Sports Officer lyngba ka skhim ‘Adopting and Grooming of One Sports Discipline’ ha u snem 2019 bad ha u snem 2022 u la ïoh rung hapoh Sports Authority of India (SAI) ban shah pyntbit shuh shuh ha kane ka jingïalehkai siatkhnam (Archery).
Shuh shuh u samla Amebalaker u la ïoh ban mihkhmat ïa ka South West Khasi Hills District ha ka 4th Meghalaya Games 2022 bad u la ïoh ïa ka tama rupa bad tama rnong. U la ïoh ruh ban mihkhmat ïa ka Jylla Meghalaya la ar (2) sien ha ka Sub Junior National Archery Championship ha u snem 2021 bad 2022.
U samla Amebalaker Wanniang ha ka jingkren jong u ha ka jingïalang ba lyngkot ha ophis treikam jong ka MDSA, u la pynpaw ka jingaikhublei na ka bynta ki nongïalam kiba long ki coach kiba la long ka kti kamon ka kti kadiang ha ki por baroh naduh ba sdang ba u la rung ha kane ka kam ïalehkai namar lymda dei ka jingbtin lynti jong ki un nym lah ban poi ha kane ka thong ba mynta. Ha kajuh ka por u la ai khublei kaba kyrpang ruh na ka bynta ki kmie ki kpa kiba long ka jingkyrshan bad ai mynsiem ha manla ka sngi ban long borabor u samla uba trei shitom bad minot thop ha la ka kam khnang ba kan long ka jingmyntoi ha ki por ki ban sa wan.
Ha ka jingkren ai mynsiem na u bah P. Wanniang, Secretary jong ka Mawkyrwat District Sports Association (MDSA) u la ong ba kum u samla u ba dang khie dang san bad kum u ‘rangïalehkai u dei ban long uba long ryntih (discipline) ha kiei kiei baroh khamtam haba u don jngai na la ka jong ka ïing ka sem, ka shnong ka thaw bad haba u don ha ka jaka shah hikai ha ka ‘TATA Archery Academy’ un long borabor uba kohnguh, ba burom bad long ruh uba sngewrit ha ki por baroh.
U la ai mynsiem shuh shuh ïa u samla Amebalaker Wanniang ba un long u samla uba ïai shah bad ïaineh ha kane ka shlem ai jinghikai khnang ba kan long ka jingkyrmen bad jingkyrkhu na ka bynta ka lawei jong u hi bad haba un sa leit ban ïashimbynta ha ki jingïalehkai un sa lah ban wanrah ka nam ka burom ïa u shimet, ka ïing ka sem, ka shnong ka thaw, ka distrik, ka jylla bad kumjuh ruh ïa ka ri baroh kawei.
Kane ka long katkum ka kyrwoh khubor na u bah Bahaman Lyngkhoi, Coach bad kum u Secretary ka Archery Committee MDSA.
