Da kijuh ki jingkynnoh ba kynnoh ïa ka Congress bad TMC, kynnoh u Bah Shangpliang ïa ka BJP

Shillong, Nailur 08 : Ka President jong ka BJP Mahila Morcha, Kong Susuki Pariat ha ka sngi Thohdieng ka la kynnoh kylla ba u MLA barim ka Mawsynram ba dei ruh u nongaiktien barim ka BJP, Bah HM Shangpliang u la pyndonkam da kijuh ki jingkynnoh ïa ka BJP mynta kumba u kynnoh ïa ki artylli kiwei ki party ba u mih ha u snem ba la dep.
Lah ban kdew hangne ba u Bah HM Shangpliang ryngkat bad ki bun bun ngut ki MLA ki la mih noh na ka Congress ha u Naiwieng 2021 ban leit pynïasoh sha ka Trinamool Congress. Hynrei ha shwa ka elekshon 2023 pat u la mih noh na ka TMC bad leit sha ka BJP bad mynta pat u la mih na ka BJP ban leit sha ka NPP.
Da kaba kam ba kitei ki jingkynnoh jong u Bah Shangpliang ïa u President ka party Bah Ernest Mawrie kidei ki bym don nongrim, ka Kong Pariat ka la ong ruh, “Kadei ka jingthmu jong u Bah Shangpliang ban pynjah burom ïa u President ka BJP bad ban pynskhem ïa ka jingthmu phet noh jong u sha kawei ka party da kaba kynnoh pat ïa kiwei.”
Shuh shuh ka la ong, “U la pynmih da kijuh ki jingkynnoh bad jingkynthoh ha ka por ba u phet noh na ki ar tylli ki political party ha u snem ba la dep, tang na ka daw ka jingmyntoi shimet bad um pat sangeh ban wad ïa ki jaka phlang ba jyrngam.”
Nalorkata, ka la ong ruh ba u State President u la thung ïa ka kum ka President BJP State Mohila Morcha bad ïa ka State Mahila Morcha Executive Committee pat la thung da ma ka ha ryngkat ka jingsyllok bad ki nongkitkam kumba la buh ha ki riti treikam jong ka party, ym kumba la kynnoh da u Bah HM Shangpliang.
Katei ka nongïalam BJP ka la pynshai ba lai ngut ki general secretary jong ka Mahila Morcha la thung katkum ki kyndon ba dei. Haba ïadei bad ka Kong Dakaniwan Shullai la ong ba la thung ïa ka kum ka General Secretary ban pynbiang ba pynkhreh ïa ki report bapher bapher katba ïa ka Kong Matilda Kharbuki bad Kong Grace Lanong na bynta ban ïarap ïa katei ka General Secretary.
Ha kajuh ka por ka la kyntait ruh ïa ka jingkynthoh jong u Bah Shangpliang ba u Bah Mawrie u la thung ïa ka kurim kum ka general secretary jong ka Mahila Morcha.
Ka pynshai ruh ba ka Kong Matilda Kharbuki kum ka general secretary kadei ka dkhot ba rim tam ka BJP namar ka la pynïasoh sha ka party naduh ka por jong u Bah Khlur Singh Lyngdoh kum u President nalor ba ka la dep ban bat ruh bun ki kam kum ka vice president mahila morcha bad kiwei ha ka por jong u Bah Shibun Lyngdoh kum u President.