Da ka jingrwai ‘khynnah rit ba smat ba sting’ pynkynmaw u MLA ïa ka jingnang jingstad
Hap ïada Ri 10% da i Dohksah, 90% da ka ka Jabieng
Shillong, Nailur 08: U Bah Brighstarwell Marbañiang, MLA ka Mawlai, haba kren mynta ka sngi ha ka jingrakhe ïa ka International Literacy Day kaba la pynlong da ka tnad pule puthi ka jylla lyngba ka State Project SENAM ha Phudmawri Presbyterian Higher Secondary School, u la pynkynmaw ïa ki Khynnah Skul bad ïa ki Kmie ki Kpa da ka jingrwai Khynnah rit ba smat ba sting bam shana kulai.
Kane kadei ka jingrwai jong u Bah, kaba kren shaphang ka jingleit skul naduh dang khynnah bad kumno ki kmie ki kpa ki trei shitom ban phah skul bad pynnang pynstad ïa ki khun jong ki.
Namar ba kane ka prokram ne ka jingrakhe mynta sngi ka long ruh ban wer bad khot ïa ki khynnah ban leit sha skul, u MLA, u khot u wer ïa ki khynnah ban leit sha skul ban ban trei shitom ban ïoh ïa ka jingnang jingstad. “Ka juk mynta kam dei shuh ka juk ban pynibor da ka bor met, hynrei ka ladei ka juk ban pyni da ka jingdep ka jabieng”, la ong u Bah Bright.
U la ong ruh ba ha ka jingïaleh ban ïada ïa ka ri bad ka jaidbynriew ruh kam dei shuh ka juk ban khlaiñ tang ki dohksah, hynrei ka la dei ka juk jong ban pyni da ka jabieng. U la ong ruh ba donkam hi teng teng ka bor dohksah ruh, hynrei la kumno kumno hap pyndonkam 10 percent ka dohksah bad 90 percent ka bor jabieng.