Shillong, Nailur, 08: Ka tnat Sam Bording jong ka Sorkar Jylla ka la shim ïa ka rai kaba eh bha ban pynduna ïa ka jingduhnong ha ka Aggregate Technical & Commercial (AT&C).
Ïa kane la pyntip da u Myntri ka tnat Sam Bording u Abu Taher Mondal ha ka jingïakren bad ki lad pathai khubor ha ka sngi Thohdieng.
“Ngi la bishar bniah bha halor kane ka mat bad nga lah ban ong ïa phi ha une u snem mang tyngka, ka la don ka jingduna khyndiat na ka jingduhnong ha ka AT&C. Ngin sa pyrshang ban peit ban kynjoh sha ka National Average kaba dei ka kam kaba jwat bha,” la ong u Myntri.
U la ong ba ka jingkiew ka AT&C ha rilum Garo ka lah ban kiew hynrei, ‘ka dei pat ka kamram jong ngi ban pynduna kham kloi katba lah.”
Ha kaba ïadei bad ka jingsam bording ha ka jylla baroh kawei, u Mondal u la ong, ka jylla mynta kam duna shuh ha ka bording watla ha ka jingshisha ka ri baroh kawei ka mad ïa ka jingkyrduh bording bad wat ka jylla bamarjan ruh ka mad ïa kane kajuh ka jingeh.
“Ïa mynta hi ngi biang. Ngi la rai ban pynlip bording tang 2 kynta ha ki jaka sor bad ha ka jylla baroh kawei ka jingpynlip bording kan long beit 3 kynta. Haoid, ki don katto katne ki bynta lane katto katne ki jaka, ka jinglip bording ka lah ban tam ïa ka por kaba la buh hynrei ka jingpynlip bording ka dei namarba ka don ka jingmaramot hynrei ka jingpynlip bording kan long beit 2 kynta ha ki jaka sor bad 3 kynta ha kiwei kiwei ki bynta jong ka jylla,” u la ong.
Ha kajuh ka por u Myntri u la pyntip ba ka Sorkar ka la buh thng ban pyndait da ki waïar ba sop jri ha ki jaka ba jur bha ka jingshah tuh ka bording.
“Ka la don ka jingthmu ha ka jaka ba la jur shaba palat ka jingtuh bording, yn pyndait noh da ki waïar sop jri khnang ba npynduna ïa ka jingduhnong,” u la bynrap.
