Da ki tiar hikai pyntbit aiti ka DREAM sha ki saw tylli ki Rehabilitation Centre

Shillong, Ïaiong 14:Ka Drug Reduction, Elimination & Action Mission (DREAM) ha ka sngi Ba-ar, ka la sam ïa ki tiar hikai jingtbit sap (skill development tools) kiba shongdor palat T.9 lak sha ki saw tylli ki Rehabilitation Centre kum ka jingpyrshang ban ïada bad pynduna ïa ka jingkylla dih droks biang jong ki nongdih bala koit.
Haba kren ha ka jingialang, u Director ka DREAM Bah Francis Kharshiing ula pynpaw ïa ka jinglong jingman ba ima halor ka jingkyrni dih droks ha Meghalaya, khamtam ha Shillong.
“Bun na kiba kyrni ki dei kiba dih heroin, bad u dei u droks ba ma tam kaba ngi la shem” ula ong.
U Bah Kharshiing ula pynpaw ba ki nongdih heroin ki pynlut hapdeng T.2000-T.2500 ha ka shisnngi ban pynneh ïa ka jingmlien, bad don kiba donkam haduh T.10,000 shi sngi namar ka jingkiew dor dang shen.
“Ki jingpyrshang ïakhun droks jong ki Pulit kala pynduna ïa ka jingpoi u droks ha Shillong,hynrei kala lam pat sha ka jingkiew ka dor, kaba pynbor ïa ki nongdih ban leh ïa ki kam bymman bad kylla long ki nongkhaii ban lah pynneh ïa la ka jingmlien” bynrap u Bah Francis.
Ban leh eiei halor kane, ka DREAM kala iatreilang bad ka Rehabilitation Centre, ITI bad ki Vocational Training Institution ba kin ai ïa ki jinghikai pyntbit ïa ki sap treikam ïa ki nongdih droks bala ioh jingkoit lane kito kiba dang don hapdeng ka jingsumar.
” Ka thong jong ngi ka long ban pynduna ïa ka jingkylla dih droks biang kiba la koit, kaba kot mynta haduh 70-80%” ong u Bah Francis.
Kine ki tiar pynroi sap ba T.9 lak tam, yn pyndonkam ha kaban ai jinghikai kum ha ka kam shet jingbam, food processing, plumbing bad wiring ha ki saw tylli ki Rehabilitation Centre-ka New Hope (shynrang bad kynthei), New Life De-addiction Centre (shynrang) bad Asha Bhavan.
Ka DREAM kan ai ruh ïa ka jingkyrshan ïa ki nongdih droks bala koit ba kin sdang seng kam bad ban treikam lajong hadien ba ki ioh syrnot na ka ITI bad ki jingiarap ban pynioh jaka iohkam.