Shillong, Naiwieng, 19: Ka Seng Samla Mawlai Pyllun ha ka taiew ba la dep ka la ïohlad ban leit sam da ki syiar ri sha nongshogn shnong ka Mawlai kiba im bad pynheh ïa la ka kamai kajih da kane ka kam.
Katkum ka kyrwoh, ka Seng ka la pynpaw ba ki dap da ka jingsngewkmen ban ïohlad ban kner lang ïa ki lad jingïarap sha ki ban pynheh ïa kane ka kam jong ki.
La ïathuh ruh ba ki don haduh 31 ngut kiba ïoh ïa kitei ki symbai syiar ïa kiba la sam sha ka jingïalang kaba long ha iingshnong Mawkynroh Umshing.
Shwa ban sam ïa kitei ki syiar ban ri, na ka liang u General Secretary ka Seng Samla Mawlai Pyllun, Bah Samran Syiem u la ïathuh ba ka jingmaitlynti ban ïoh sam ïa kitei ki jingri kadei da ka jingtrei borbah jong baroh ki nongkitkam ka seng.
La ïoh ruh ïa ka jingkren na u President ka Seng Samla, Bah Samuel Biam uba la kyntu ïa ki paidbah ba ïoh ïa kitei ki jingmyntoi ba kin nang trei shitom shuh shuh bad pynheh ïa ka kam ri jingri jong ki.
“Haduh mynta ka jylla ka dang shaniah na shabar jylla ban ban pyndap ïa ka jingdonkam doh syiar ha ka jylla baroh kawei,” u la ong.
Shuh shuh u la pynpaw ruh ïa ki tnad sorkar kiba la ai ka jingïatrei lang bad ka seng na ka bynta ban pynurlong ïa katei ka jingïarap.
Na ka lïang ki nongïoh jingmyntoi ki la pynpaw ïa ka jingkmen kaba khraw ba ki ïoh ïa kum kitei ki jingïarap namar ba kim pat ju ïoh pdiang ïa kum kine ki lad jingïarap na ki nongmihkhmat lane an kino kino ki kynhun.
Kane ka long katkum ka kyrwoh ba la phah da u Bah Maiostar Mylliemngap, Assistant Organising Secretary ka SSMP.
