Shillong, Naiwieng 19 : Ka kynhun rwai ba pawnam ha India, ka SANAM ka la ai ka jingïaroh ïa ka kynhun Snow-White, kawei na ki kynhun tem ba la rim bha na ka jylla hadien ba ki la ïohsngew markhmat ïa ka jingtbit ki nongtem bad nongrwai jong kane ka kynhun ha ka tamasa Cherry Blossom kaba long ha madan Kurkalang ha ka janmiet sngi Saitjaiñ.
Katei ka kynhun hapoh ka jingïalam jong u Sanam Puri haba kren shwa ban tem bad rwai, u la ong, “Ngi sngewkmen ban ïohsngew ba ki lajong kum ka Snow-White ki la tbit katne bad kane hi ka paw ba kadei ka kynhun kaba kynsai tam na Shillong.”
Shuh shuh u ong ruh ba ki sngewkmen kum ka kynhun ban ïohi ïa ka jingshongshit ki paidbah ban tuid sha katei ka lympung Cherry Blossom ïa kaba la pynlong da ka jingïatrei lang hapdeng ka sorkar Meghalaya hapoh ka jinglamkhmat u Myntri Rangbah ka jylla bad ka tnad Tourism.
Nalorkata, ki la pynpaw ba kadei ka sien kaba nyngkong ba ki wan sha kane ka thaiñ shatei lam-mihngi jong ka ri bad ong ruh ba ki kmen ban ïohi ba ki paidbah ki tip bad sngewtynnad bha ïa ka jingrwai jong ki.
