Shillong, Jymmang 21 : Ka jingkynmaw burom ïa ka jingdap shisnem ka jingkhlad noh u nongrwai ba kynsai tam jong ka jylla, Bah Rana Kharkongor ka la long kaba shongkun bad shoh mynsiem bha da ka jingwan pynshngaiñ lang da bun ki para nongrwai, ki bahaiing ha sem, ki sengbhalang, ki heh sorkar bad bun kiwei kiwei.
Ha kane ka sngi, na ka liang ki para nongrwai la ïoh ruh ïa ka khana ba lyngkot shaphang ka jingim jong utei u riewkhraw na u Bah Headingson Ryntathiang, uwei naki nongrwai ba u Bah Rana u la pynlut bun bha ka por ym tang ha ka rwai ka siaw hynrei wat ha ka jingïaid lynti jong u ha ka jingim.
“Um dei shuh tang kum u para hynrei ruh kum u paralok namar ngi la ïahehlang bad ngi la ïatreilang bun bha khamtam ha ka por ba thmu ban pynmih ïa ka kaset ba nyngkong ka Jingkieng Ksiar,” ong u Bah Headingson.
Na ka liang u Bah Raphael Warjri u la ïathuh ba dei u Bah Rana uba wanrah ïa ka video camera ba nyngkong eh ha ka jylla kaba u wanrah naduh Hongkong ha u snem 1994. “Utei u rangbah u don bynta ym tang ha ki kam rwai hynrei u la don bynta ruh wat ha ki dur im ne ki kam shna phlim,” u la ong.
Haba bynrap lang, u General Secretary ka KSU, samla Donald V Thabah u la ong ba ki jingrwai jong utei u rangbah ba la khlad noh ki dang ïai sawa naduh ka por ba u dang rit bad tad haduh mynta mynne.
“Nga ïohi ïa u kum u Khlur ka Jaidbynriew,” u la ong da kaba kdew ba ki jingrwai ba u Bah Rana u rwai kim dei satia tang na shynrong hynrei ki dei kiba u da ngam jylliew bha la ka long ha ka long ha ka liang ka jingieid, ka mariang ne wat haba iadei ban kyrsiew ïa ka Jaidbynriew,” u la ong.
Shwa kane, la ïoh ruh ïa ka jingkren maitphang na ka khun jong u Bah Rana, ka Kong Maphidalin Kharhunai.
La pynphuh bad pynshongkun ïa katei ka jingkynmaw burom da kiba bun ki nongrwai kynthup naduh u Bah Maxter Warjri, nangta na ki khun jong u kynthup naduhi Kong Mana Corianda Kharhunai, Kong Badaplin Kharhunai, Kong Labiang Lyngdoh, Kong Ripa Lyngdoh bad ruh na ki khun ksiew jong utei u rangbah.
Ha kane ka sngi la pyni paidbah ruh ïa ka jingïaid lynti jong u Bah Rana naduh ki sngi kiba sdang tad haduh ki sngi kiba un pynkut noh ïa ka jingmih pyrthei ha ki kam rwai bad tad haduh ba un da khlad noh ha ka 21tarik u Jymmang, 2021.
