Da ki spah ngut ki samla nongkyndong ki la ïohkam shabar jylla wat hapdeng ki jingeh

0

Shillong, Ïaïong 23 : Da ki spah ngut ki samla na ki jaka nongkyndong kiba shong tang ha ki Class VIII, Class IX, Class X ki don sha kylleng kylleng ki jaka jong ka ri India ban leit trei ha ki laiñ bapher bapher kum ki kam mekhanik, kam hospital, ki beauty parlour, ha ki call centre, nangta ha ki kompeni suh jaiñ bad kiwei kiwei de ki laiñ.
Kine ki Samla kidei kiba la ïoh lad ban leit trei sha ki nongbah ba heh jong ka ri India kum ka sha Mumbai, Bangalore, Delhi, Chennai lyngba ka jingïarap na ka skhim DDU- GYK, kaba dei ka skim jong ka sorkar pdeng ba la pyntreikam da ka Ministry of Rural Development.
Ha Meghalaya la pyntreikam da ka Community and Rural Development lyngba ki District bad ki Block.
Kiba kum kine ki khynnah kiba la ïoh kam ïoh jam shabar jylla, kidei kiba la pyndep ïa ki training ne ki jingshah hikai na ki 18 tylli ki Training Centre jong ka sorkar Meghalaya kiba don ha Guwahati. Kine ki training ki lah long hi kum ki skul, ha kaba ki don ki nonghikai, ka don ka training centre, ki hostel na ka bynta ki samla shynrang bad kynthei. Ym tang katta, hynrei ki khynnah ruh ki hap ban phong uniform bad ka por ba pynlong ka training kadei kaba la da buh thikna bad ka por ban poi ha ki hostel ruh kadei kaba lada buh pyrkhing.
Ha ka jingleit jurip u nongthoh khubor ryngkat ki ophisar kiba dei peit ïa kine ki training centre bad ki samla na Mawthadraishan Block kiba don ka jingangnud ban leit shah hikai ha kine ki training centre, la lap ba kine ki training centre kiba da pynbiang thik pa thik ïa ki jingdonkam bad ki ophisar na ka jylla ruh ki da shimkhia ban hiar sha kine ki training centre na ka por sha ka por ban leit peit bad ïakynduh ïa kine ki samla ba leit pule.
Kane ka jingleit jurip ka long khnang ba ki samla bad ki kmie ki kpa kin ïohi da la ki jong ki khmat ïa kine ki training centre bad khamtam eh ban ïakynduh markhmat bad ki samla kiba la shah hikai ha kine ki training centre bad ban tip ïa ki jingmyntoi ne ki jingeh ruh ba ki ïakynduh.
Shuwa ban jied ïa ki samla ban leit shah pyntbit ha kine ki training centre, na ka liang ki Block bad ki District ki ju pynlong ïa ki awareness programme ban pynsngewthuh ha ki shnong ki thaw ha kaba la khot lang ïa ki samla, ki kmie ki kpa bad ki nongïalam shnong.
Hadien kane lada don ki samla kiba kwah ban leit pyntbit la pynsngewthuh shuh shuh ïa ki ha ryngkat ka jingïadon lang ki kmie ki kpa.
Kiba bun kine ki samla kiba la leit pyntbit ha kine ki training centre, ki la pynpaw ka jingsngewkmen ba ki la lah ban shah hikai ha kine ki centre bad khamtam lei lei kito kiba la ïoh ban treikam.
“Nyngkong, ngam sngewnud ban leit sha kine ki training centre, namar nga lehraiñ bieit bad ngam nang than ïa ki jait ktien, hynrei mynta nga la shlur bad kloi ban leit trei noh shabar”, la ong iwei i Samla kynthei na Mawthadraishan Block.
Ha kine ki jaka training, ki nonghikai ki don lang ki khasi, ki garo bad kiwei de ki jaidbynriew kiba ka jinghikai kam dei tang ha ka kam ba kin trei, hynrei la hikai ruh halor ka jingnang ïa kiwei de ki jait ktien, nangta ïa ka jingpynkhreh ha ka jingmut jingpyrkhat ban leit trei shabar jylla bad kumjuh ruh halor ka akor ka burom.
Uwei u samla na Myriaw, u ba la trei sha Mumbai u la ïathuh lyngba ka Video Call ïa kiba leit peit ha ki training centre, u la ïathuh ba u trei ha kawei ka kompeni shna kali ha Mumbai bad u da sngewtynnad bad kmen ruh ba wat ha ka jingpule kaba rit kyrdan ruh u la lah ban kamai bad ïarap lem ha ïing hasem.
Uwei pat uba wan pyntbit ha ka laiñ mekhanik, u la ïathuh ba ha ka por ba u mih na ïing i kmie jong u, i la ong ban rah da ki jaiñ kiba tngit ne ki jaiñ ïong namar ba u hap ban leit trei mekhanik, pynban ynda la poi ha training centre, u la hap ban phong uniform bad ka kam kaba shah hikai kadei ka kam technician bad la trei beit da ki machine kam don satia kaba hap ban rung khrum kali ne ka jingtrei ban bit mobil ne bit jaboh.
Kiwei pat ki kam kiba la hikai ki long ban trei ban ïarap ïa ki nurse ha ki Hospital ne kata ka kam General Duty Assistant. Nangta hadien ba ki la kham tbit ki ïoh ruh ban ïarap ïa ki Doktor ha ki ICU. Na ka bynta kiba pyndep ïa kane ka training, ka kam ka la ap lypa ha ki Hospital kiba pawnam ha Bangalore bad kiwei kiwei de ki Hospital.
Kane ka training ka long hapdeng 4 bad 6 bnai bad na ka liang ki ophisar ki la ïathuh ba ki samla kiba lah ban shah ïa ki jingeh bad kiba sngewthuh ïa ki jingeh jong ki kmie ki kpa bad ka ïing ka sem, kiba bun ki pyndep ïa ka training bad ki la ïoh lad ban leit trei sha ki jaka bapher bapher jong ka ri India.
Na ka liang ki ophisar ki kyntu ïa ki samla ba kin shim ïa kane ka kabu ban mih shakhmat namar kane kadei ka lad kaba biang eh ïa ki ba kin ïoh jam wat hapdeng ka jingpule kaba tang ha Class X.

Leave A Reply

Your email address will not be published.