Da ki kynja tiar siat ba shu shna kai pynap ki runar ban lute na ka Kharkhana tylliat maw ha Killing
![](https://mawphor.com/wp-content/uploads/2022/03/mawphor.jpg)
Nongpoh, Naitung 13: Ha kawei na ka jingjia bym poi pyrkhat ki trai jong kawei ka Kor tylliat maw (Stone Crusher) ha Killing ki la duh ei haduh T. 1.9 lak, kaba dei hadien ba ki kynhun jong ki runar ki la wan ban lute tang da kaba pynap da ki kynja tiar siat ba la shu shna da ki dieng ban ioh syndon ïa katei ka song pisa na katei ka ka kor tylliat maw kaba don ha Killing ba hap ha ka Khanapara Police Station ha Ri Bhoi.
Kumba la ioh lum jingtip, la ba kane ka jingjia ka la jia ha ka 11 tarik u Naitung 2023 ha ka por 2 baje ei ei mynstep, ha kaba ki kynhun jong ki runar kiba la don phra ngut ki la wan rung sha katei ka kor tylliat maw ban pynap da ki kynja tiar siat tang ban ioh lute na katei ka kor tylliat maw, kata ruh ki leit dang step phyrngap.
Ka tyllong khubor ka ïathuh ruh, ba ki don kumba 8 ngut ki runar kiba la wan rung jubor sha katei ka kor tylliat maw da kaba pynap ïa ki tiar siat bad rung beit sha ka ophis treikam ha ka jaka buh pisa (Locker) bad ki la ioh lad ruh ban rong tuh ïa katei ka song pisa bad ki sa phet krat pat ïa lade na katei ka kor tylliat maw.
Halor kane ka jingjia, ki bor pulit ka Khanapra Police Station ryngkat ki CRPF ki la hiar mardor sha katei ka kor tylliat maw ban pynlong ïa ka jingtohkit bad hadien ba ki la poi ha katei ka jaka lap ba kitei ki runar ki la dep ban phet krad ryngka ka jingioh rong ïa katei ka song pisa.
La ïathuh ruh ba kitei ki runar ki pyrshang ban pyntieng pynsmiej ïa ki nongtrei ha katei ka kor tylliat maw tang da kaba pynap da ka kynjat tiar siat ba shna da ki dieng hakaba haduh ba ki la ioh la dban rong tuh ïa katei ka song pisa.
Katkum ka tyllong khubor ba la ioh lum na ki pulit ka Ri Bhoi, la ong ba ki la dep ban pynlong ïa ka jingtohkit halor kane ka jingjia bad ki la ioh ksai ruh ïa ki runar ba don kti ha kaba lute ïa katei ka kor tylliat maw da ki dien kti jong kitei ki runar, ha kaba la pyndonkam ruh ïa ka jingtohkit da ki kynhun ksew jong ki pulit (Dong Squad) ban lap ksai ïa ki runar kiba don kti ha kane ka kam lute pisa jubor na katei ka kor tylliat maw.