Da ki kompeni ba paka tam yn jied ka Sorkar ban pynïaid ïa ka EMRI-108 ha jylla
![](https://mawphor.com/wp-content/uploads/2023/10/108.jpg)
Shillong, Naiwieng 06 : Ka Myntri ka tnad ka Koit ka Khiah ka jylla, Kong Ampareen Lyngdoh ha ka sngi Nyngkong ka la ong ba ka sorkar jylla kan sa jied ïa ka kompeni kaba paka tam ban pynïaid ïa ka 108 ha ka jylla.
Ha kajuh ka por ka la kyntu ïa ki kompeni kiba shim bynta ha ka jingïaknieh ban pynïaid ba kin long kiba ïai shah bad ap ïa ka jingjied kaba long katkum ki kyndon ym ban leit sha ki lad pathai khubor ban kynthoh iwei ïa iwei pat.
Baroh ki don haduh hynñiew tylli ki kompeni kiba shim bynta ha katei ka jingïakhlieh ban pynïaid ïa ka 108 ha ka jylla.
“Ngim ym pynsngew ïa kine kiei kiei baroh ki jingïaknieh ne kynad hapdeng ki kompeni kiba kwah ban pynïaid namarba ngi don hangne ban jied da kaba bha tam na kaba bha tam. Ki jingkynnoh, ki jingkynthoh kin ym lah satia ban weng ïa ki jingeh,” ong ka Myntri haba kren bad ki lad pathai khubor.
Ha kajuh ka por ka ong ruh ka sorkar kan ai da ki ambulance kiba biang tam na ka bynta ki paidbah ka jylla. “Ka jingshakri lyngba ka 108 ka la mad bun kiei kiei ha ki khyndiat por ba la dep bad kumta ngan ym ailad ba kan don kano kano ka jingshah pynthame kum ka sorkar haba ïadei bad kane ka rai.”
Ka Myntri ka la kyntu ruh ïa ki kynhun kiba ïa knieh ba kin ap shwa ïa ka rai na ka sorkar kaba dang bishar mynta ïano kan jied. Ka la ong ruh ba ha ka jingshisha kim dei satia ban leit sha ki lad pathai khubor ban ujor namar ka jaka ujor jongki kadei ha ka tender committee. Ka la ong ruh ba haba don kino kino ki jingujor mardor na ka liang ka sorkar ka la tuklar ban peit.
Na ka liang ka Myntri ka la pynpaw ba ka kwah ban ïohi ba ki ambulance kin poi ha man ki block bad kin don ruh ki kor ki bor kiba lah ban pynïasoh ïa ki nongwad jingïarap ne ki nongpang naduh ka por ba ki leit shaw na ïing hadudh ka por ba ki phah sha sha ki jaka sumar.