Shillong, Naiwieng, 06: Ka Shillong Civil Hospital ka la ïohlum T.6,29,18,877 klur hapoh lai snem na ki nongpang kiba wad jingsumar ha kane ka jaka ai jingsumar. Ïa kane la pyntip da u nongwad RTI u Bah Disparsing Rani katkum ka jubab RTI ba la ïoh na ka Civil Hospital.
Ha ka jingïakren bad ki lad pathai khubor ha ka Lah Sngi u Blei u Bah Disparsing Rani u la ïathuh ba kane ka jingïoh lum pisa jong ka Shillong Civil Hospital ka long na ka CT Scan, MRI, Blood Test, UG Scan bad X-Ray.
U la ïathuh ba ka jubab RTI ka pynpaw ba ha ki 3 snem, ka Hospital ka la ïoh lum T. 2.42 klur na ka jingpyndonkam ki paidbah ïa ka CT Scan, T. 26 lak na ka MRI, na ka X-Ray T.4 lak, Blood Test T.2.55 klur bad T. 57 lak na ka UG Scan.
“Kane ka jingwad RTI ka dei ban pyntip paidbah ha kaba ïadei bad ka jingïoh lum ka Shillong Civil Hospital namarba tang ha ki lai snem, kala ïoh lum T. 6,29,18,877 klur bad ki paidbah ki donhok ban ïoh ki lad jingsumar kiba bha,” ong u Bah Disparsing.
U la ïathuh ba ka don kawei ka kor MRI Scan kaba shongdor T. 4.90 klur kaba la pyntreikam naduh 2013 hynrei mynta ka la sniew bad kam treikam shuh.
Shuh shuh u Bah Disparsing u la ïathuh ruh ba katkum ka jubab RTI ba la ïoh pdiang na ka ophis jong ka Directorate of Health Services (MI) la pynpaw ba ki don ki Doctor, Staff Nurse bad ki nongtrei 4 Grade hapoh ka Civil Hospital Shillong ki bym ïoh tulop naduh ka por ba ki trei haba ka jylla Meghalaya ka la shah lynshop ha ka jingpang khlam COVID-19.
“Hadien ba ka Sorkar ka pynpaw ba ka ïoh pdiang tang 76 klur na Delhi. Hynrei ha ka jubab RTI ka pynpaw ba ka la ïoh pisa T. 119 klur bad ka pisa kaba dang don bad ka Sorkar ka long sa T. 43 klur. Balei ka Sorkar kam siew noh ïa ka tulop jong kine ki nongtrei. Haba ki trei ïa ka kam, ka Sorkar ruh ka dei ban sngewthuh lem ïa ka jingdonkam jong ki,” u la ong.
Ha kaba ïadei bad ka jingshna ïa ka surok saw laiñ Shillong-Dawki, u Bah Disparsing Rani u la ïathuh ba katkum ka jubab RTI ba la ïoh na ka Ministry of Raods Transport and Highways ka Sorkar India, la pynpaw ba ïa kane ka projek la aiti sha ka M/s PCC Go Tech Pvt Ltd ban shna pynheh ïa ka surok na Umshyrpi haduh Umdiengpung, 7 Mer Upper Shillong. Ka kam ka la ïaid katkum ka jingaipor haduh 2 snem ban pyndep ïa ka Phase-I. Mynta ka pakage-2, Pakage-3, bad 5 ruh ka dang ïaid. Ka don ruh ka projek ba dang pynkhreh ïa ka Detailed Project Report (DPR) na ka bynta ka Shillong Eastern Bypass ban shna ïa ka surok na Mawlyngkhung, Mawryngkneng, Jowai, Ratacherra kaba jrong 138 kilomitar. Kane ka dang ïaid bad ka projek ban shna ïa ka surok Mawthir-Kyrshai ruh ka dang ïaid shakhmat.”
“Nga kyntu ïa ki paidbah, ïa ki Dorbar Shnong bad ïa ki Sengbhalang ba ngin buh lang ïa ka thong ba yn dup lah ban pyndep kloi ïa kine ki projek bad ym pynthud ïa ki kompeni namarba ka don ka jingkynnoh ba ka don ka jingpynwit bad kata ka pynlehraiñ. Ki nongtrei jong ki kompeni ki wan sah tang shipor bad ki leit phai noh,” u la ong.
“Ngi ruh ngin buh nuksa ïa kiwei ki jylla kum ka Mizoram bad Manipur ba ngim dei ban pynthud khnang ba ka jingangnud jong u paidbah kan long kaba biang,” u la ong.
