Da ki klur pynlut ka sorkar ban siew ïa ka bai jaka ban pynheh ïa ka Shillong Airport : Sniawbhalang

Shillong, Lber 04: Ka sorkar jylla ka la pynlut kumba T. 123,26,70,213 na ka bynta ban siew ïa ka bai jaka na ka bynta ban kyntiew ïa ki kam pynroi bad kumjuh ruh ban shna pynheh ïa ka Shillong airport.
Ïa kane la ïathuh da u Symbud Myntri Rangbah ka jylla u ba khmih ïa ka tnat Transport u Bah Sniawbhalang Dhar ïa ka jingkylli kaba la wanrah ha ka sngi baar hapoh ka Dorbar Mang tyngka.
Lah ban ong ba ka Shillong Airport kumba ka long mynta ka don ïa ka runway kaba jngai kumba 1,829 meter, bad ka long kaba lah na ka bynta ka ATR-72 bad ka jingpyntreikam ïa ka Q-400 aircraft.
Kumba ka long mynta ka airport ka treikam na ka bynta ki liengsuiñ kiba her na ka Delhi, Kolkata, Imphal, Pasighat bad Lengpui.
Ka jingheh jong ka jaka halor kane ka kad liengsuiñ ka long 416.16 acre bad ka area na ka bynta ka funnel ka long 45.57 acre ha kaba ka jingkheiñ baroh ka long 461.73 acre.
Ha kaba ïadei bad kane na ka liang jong u Bah Dhar u la pyntip ba ka 192 acre ka jaka la dep ban ïoh ha shwa ka snem 1972, bad ka 192.16 acre ka jaka la ïoh ha ka 26 tarik u Naiwieng, 2010, bad ïa ka 32 acre ka jaka na ki shipai la ïoh ha ka 25 tarik u Nailur, 2017.
Ka jingthied ïa ka jaka la leh da ka Approach Funnel Cluster II & III (Phase-I & Phase-II) ha u snem 2018 ha kaba na ka 22.81 acre la ïoh na ka bynta ka Phase I bad 21.37 acre la ïoh na ka bynta ka Phase II.
Shuh shuh ka jaka kaba 1.39 acre la ïoh ha ka snem 2020 da ka Approach Funnel of Cluster II & III.
U la ong ruh ba ka jaka kaba 32 acre kaba dei jong ki shipai la rah noh na ka bynta ki kam pynroi ïa ka airport kaba dang ïaid bad kaba la don ruh hapdeng ka jingïakren.
“Kumba ka long mynta ka jingheh jong ka jaka ka long 461.73 acre kaba la donkam da ka sorkar na ka bynta ban pynbha ïa kane ka kad liengsuiñ ha ka jylla,” u la bynrap.