Da ki khiew syntiew ha u Motphran kynmaw burom ka BJP ïa ki khlawait ba sei ka Meghalaya

Shillong, Nohprah 30 : Ka Meghalaya BJP Mahila Morcha ryngkat ka BJYM ki la rakhe da ka rukom kaba kham pher ïa ka lyngkhuh sngi ïap jong u khlawait ba ka Meghalaya ka sei, u Woh Kiang Nangbah.
Ha kane ka sngi, katei ka kynhun hadien ba ki la dep ban buh syntiew bad pynlong ka jingïalang kaba lyngkot ha State Central Library na ka liang ka President ka Mahila Morcha, Kong Sukhi Pariat ka la ong, “Ngi kyntu ïa ka sorkar jylla ba kan pynleit jingmut ha ka jingeh ba ki longkmie ba kamai marwei ki kynduh. Dei ki longkmie kiba pynwandur ïa ka lawei jong ka imlang sahlang kumta donkam ban ïarap bad kyrshan ïa ki khnang ba ngin lah ban ïohi ïa ka lawei kaba khlaiñ.”
Nalor kata, ka la ong ruh ba kawei pat ka jingeh ba kane ka pateng ka kynduh kadei ka jingjyllei palat ka jingïoh rung u drok ha ka jingim ki khun samla ha kane ka jylla. Halor kane ka bynta ruh ka ong ba donkam ba ka imlang sahlang baroh kawei ban ïa tylli lang kawei ka buit kawei ka bor khnang ba yn lah ban pynkiar ïa ki khun samla kiba dang khia na kitei ki jingdih kiba la teh la khum ïa bun ki samla.
Hadien kane, ka BJP ka la leit ruh sha Motphran ban kynmaw burom lang ia u Kïang Nangbad ïa kiwei pat ki riewshlur ka jylla da kaba leit ban buh da ki khiew syntiew ha u Motphran. “Ïa u Motphran la tip kum u mot sah kynmaw ïa ki shipai Khasi kiba la aiti ïa la ka jingim ha France ha ka Thma Bah Banyngkong. Ngi kyntu ïa ki paidbah ba kin sumar bad leh khuid ïa u Mopthran ym ban ïa tah da ki jingthoh ba harukom kiban pynjaboh ïa u,” la bynrap shuh shuh katei ka nongïalam BJP.