Nongpoh, Jymmang 16: Ki ar tylli ki kynhun Balang kiba don ha ka shnong Lamalong, kaba hap hapoh ka Mawhati constituency, ki la ioh ïa ki lad jingïarap na u MDC, u Bah Charles Marngar, uba la mang kyrpang ban pynioh ïa ki jaka rieh tngen (Graveyard shed) bad ka jaka ban pynlong mass bakhuid ha ki lum jingtep jong ki, kaba dei katkum ka jingdonkam ba la pynpaw da kitei ki kynhun balang.
Kine ki ar kynhun balang kiba la ioh ïa ka jingïarap na u MDC ban shna ïa kitei ki jaka ban leh niam ha ka por ba khlad briew ha u lum jingtep ki kynthup ïa ka Balang Presbyterian Mawraja bad ka Balang Katholok Umbi kiba don hapoh ka shnong Lamalong.
Kine ki ar kynhun balang ki la ioh ïa kitei ki jingïarap ban shna ïa kitei ki jaka riehtngen lane ban pynlong ïa ka lehniam ha ka por ban tep briew ka dei lyngba ka skhim MDC kaba la mang lyngba ka Fifteen Finance Commission jong u snem 2020-21.
Ïa kitei ki ing rieh teng lane ki ing ba la shna na ka bynta ban pynlong ïa ka lehniam ha ka por ïap briew ha ki lum jingtep la plie paidbah hi mynta ka sngi da u MDC ka Mawhati, u Charles Marngar bad bud pat sa ka jingïalang paidbah ha madan skul Lamalong ba la pynïaid da u Rangbah Shnong.
Kane ka jingïakynduhlang baroh artylli ki Balang ka long ka jingkmen ka ba khraw bad ki la pynpaw ruh ïa ka jingïalong tylli para khristan ong u MDC, u Bah Charles Marngar haba kren ha kane ka jingïalang.
Kiwei kiwei kiba la don lang ha kane ka sngi ki kynthup ïa u Bah Pius Shadap, RS Mawpat bad Working President ka Mawhati BCC, Bah Come Lapang, Bah Leader Shangrang, Bah P Khymdeit bad kiwei kiwei.
Baroh artylli ki Balang ki la pynpaw ka jingkmen ban ioh ïa kine ki ïing ha ki lum jingtep jong ka Balang jong ki, kaba kim pat ju ioh mynno mynno ruh.
