Nongpoh, Nailar 03: Kum ka jingïakyrshan lang na ka bynta ban kiew shaphrang kawei na ka skul pule ha kaba ai jingnang jingstad ïa ki khynnah skul ka skul ka thaiñ Rilong ha Ri Bhoi District, ka Ri Bhoi Youth Federation (RBYF) Umsning Circle ha ka sngi Saitjain ka la leit ban noh synñiang daka ka Ben bad ka Blackboard sha ka RCLP School Rilong, kaba dei hadien ba ka seng ka la ioh jingtip ba katei ka skul ka don hapdeng shibun ki jingduna ban kyntiew ïa ka jingnang jingstad.
Ha kane ka sngi ba la leit ban ai jingïarap da ka Ben bad ka Blackboard la ïalam da u Bah Balakmenlang Nongbri, President ka Umsning Circle, u Breggie Sun, General Secretary, u samla Andrew Nongneng lem bad kiwei ki dkhot ka seng ha kaba nalor ka jingnoh synñiang da ki Ben bad ka Blackboard ki la ai mynsiem ruh ïa ki bor pynïaid skul bad ki nonghikai ba kin dang trei shitom na ka bynta ban kyntiew ïa ka jingnang jingstad jong ki heprit kiba pule ha katei ka skul.
Haba leit ban aiti ïa kitei ki Ben bad Blackboard la pdiang sngewbha da ki bor pynïaid katei ka skul bad ki nonghikai sha ki nongïalam ka RBYF Umsning Circle kiba la don ka jingiohi jngai ban kyrshan lem ïa kane ka skul bad na ka liang ki bor pynïaid skul ruh ki la ai ka jingkhublei kaba kyrpang ïa ka RBYF kiba la ïarap da ki Ben bad ka Blackboard kaba long ka jingdonkam jong ki khynnah skul.
Na ka liang u President ka RBYF Umsning Circle, u Bah Balakmenlang Nongbri ha kane ka sngi u la ai ka jingkhublei kaba kyrpang ïa ki nonghikai bad ki bor pynïaid skul, ha kaba wat la kane ka skul ka don shibun ki jingduna, hynrei ki shim ïa kata ka jingkitkhlieh ban ai jingnang jingstad ïa ki khynnah skul.
Na ka liang utei u nongïalam u la ai mynsiem ruh ïa ki nonghikai ba kin dang trei shitom ban saindur ïa ka lawei ki heprit na katei ka thaiñ, namar ha kane ka juk stad ba mynta la sngewthuh ba khlem ka jingnang jingstad ki heprit kin nym ioh ïa kata ka lawei kaba phyrnai bad ka jingshim khia bad ka jinglen lade ki bor pynïaid skul bad ki nonghikai kan long ka jingkyrkhu kaba khraw na ka bynta ka lawei ba phyrnai jong ki heprit ha katei ka thaiñ, u la bynrap.
