Shillong, Rymphang 10: U Myntri ka tnat Pule Puthi ka sorkar jylla u Rakkam A Sangma ha ka sngi Nyngkong u la maham ban shim ki jingpynshitom kiba tyngeh ïa kito kiba donkti ha ki kam thung nonghikai beaiñ ne “proxy teachers” ha ki skul sorkar ha ka jylla.
“Lada ngi ïohpdiang ïa ki jingujor ba don kum kine, khlem pep ka sorkar kan shim ki jingpynshitom ba tyngeh pyrshah ïa kito ki nonghikai naba ngi kyrpad ïa ki nonghikai lada phi aplai ban long kum ki nonghikai, long kum ki nonghikai,” ong u Sangma sha ki lad pathai khubor.
“Ka sorkar kan pynmih ruh ïa ka jingmaham ïa ki khlieh jong ki jaka pule naba kadei ka jingkitkhlieh jong ki lada ki shah ïa ki proxy teacher namar hadien ba la buh ïa ka teachers information management system (TIMS), kin shah pynngat ha ki jingeh,” u la bynrap.
Katkum ka jingong jong u, ki nonghikai kim lah ban thung ïano ïano ha ka jaka jong ki.
U Sangma ha kawei ka liang u la ong ba ki don bun ki skul, kiba la thung ïa ki nonghikai bynrap ne ki ban ïarap ha ka jingpynlut jong ki, ban lah ban pynbeit ïa ka jingduna ki nonghikai.
“Hynrei phim dei pat ban thung ïano ïano ha ka jaka jong phi, kane ka dei kaba bakla,” u la ong.
Haba kyrpad ïa ki nonghikai ba kim dei ban don bynta ha kum kine ki jingleh kiba beaiñ, u Myntri ka pule puthi u la ong, “Lada phi don ki kam kiba kyrkieh phi lah ban pan da ka shuti lyngba ka rukom treikam kaba dei, kane kadei ka jingkyrpad jong nga.”
