Nongpoh, Nailar 19: Ka Seng Hynñiewtrep Achik National Movement (HANM) mynta ka sngi ka la lah ban pyniar sa ïa kawei ka shnat treikam ha Nongrim Jirang da ka jingthmu ban dang pynkhlaiñ ïa ka jingshakri na ka bynta ki paidbah hapoh ka jylla bad kane ka seng ka la lah ruh ban pynbam smai ïa ki nongïalam ba thymmai ba kin shim ïa kata ka lyngkor nongïalam ban trei na ka bynta ka bha ka miat jong ki paradoh ki parasnam ha katei ka thaiñ Jirang.
Kane ka shnat treikam ba thymmai ba la suit la shor da ka seng HANM ka dei ka Nongrim Jirang Unit bad ha ka jingïalang kaba la long mynta ka sngi u President ba rangbah, u Bah Lamphrang Kharbani u la wan ban pynbam smai ïa ki nongïalam bad ki dkhot ba thymmai katei ka Nongrim Jirang Unit shuwa ba kin shim ïa kata ka bynta ban long ki dkhot ba pura jong ka seng ban ïa khun na ka bynta ki paradoh ki parasnam hapoh katei ka thaiñ Jirang.
Kine ki nongïalam ba la pynbam smai da u nongïalam ba rangbah ka seng HANM, ki kynthup ïa u President, u Bah Wanbok Syngkli, Vice president, Kyrshanbor Syiem, General Secretary, Apsait Rani, Chief Organizing Secretary, Ronald Nongsien bad kynthup kiwei kiwei ki nongïalam bad ki dkhot kane ka Unit.
Kiwei kiwei kiba la ïa don lang ha kane ka jingïalang ba la pynskhem bad pynbam smai ïa kitei ki nongïalam ka HANM, Nongrim Jirang ki kynthup ïa u president ka HANM Western Ri Bhoi, u Bah Sumar Lyngdoh, Sandy Nongrum, Secretary ka HANM Western Ri Bhoi bad ruh kiwei kiwei ki nongïalam na ka sengkmie bad na Ri Bhoi District.
Kumba la pynpaw da u President ba rnagbah kane ka seng, u Bah Lamphrang Kharbani, u la pynpaw ba ka seng ka sngewkmen ba bun ki khun samla ki la wan ban pynïasoh sha kane ka seng ban long kita ki shipai ka jaid bynriew bad ka jingthmu ba ka seng ka la dang pynïar ïa ki shnat treikam ruh ka long ban pynkhlaiñ ïa ka jingshakri na ka bynta ka dawbah jong ka jaid bynriew.
Shuh shuh, u la bynrap ruh da kaba ong ba ka seng ka khmih lynti ruh ba ki nongïalam kane ka Unit kin shim ïa kata ka jingkitkhlieh kum kita ki dkhot ba pura ka seng ban peit ïa ka eh ka shon ki paidbah ha ka thaiñ Jirang bad ka seng ka khmih lynti ruh ba kine ki nongïalam kin pyndonkam hok shisha ïa ka sap nongïalam ym na ka bynta ka jingmyntoi shimet bad ki dei ban trei borbah na ka bynta ka bha ka miat, ka roi ka par bad ka jingkiew shaphrang jong ki paradoh ki para snam ba ki dei ban long kynrad hala ka jong ka jylla, u la bynrap.
