Ka tnad jngohkai ka dei ban wan jurip ïa ka lynti ïaid kjat ha Mawphanlur: Bony Lyngdoh

Nongstoiñ, Nailar 19: Ka jingmang pisa jong ka sorkar na ka bynta ka tnad jngohkai pyrthei, ban shna ïa ka lynti ïaid kjat kaba shi kilomitar shiteng na Mawphanlur shaduh kliarlum Mawthadraishan ka la sep ei, namar ki don ki nongshong shnong kiba shna ïa ka pung kaba heh bha kaba katei ka lynti ïaid kjat ka dei ïaid lyngba narud jong katei ka pung.
“Wat hadien ba la pynpra lyngkhot lyngkhai jong katei ka lynti ïaid kjat, na ka liang ka tnad jngohkai pyrthei kam shym pat la wan jurip satia haduh mynta. Ha kaba ïadei bad katei ka jingpynpra ïa katei ka lynti ïaid kjat, ki la don ki nongïalam sengbhalang kiba la leit ban ïa kynduh ïa u trai jong katei ka pung hynrei um shym pynsngap”, ong u bah Bony Lyngdoh Lyngkhoi u ba dei ruh u nongpeit ïa ka Mawphanlur Tourist spot.
U bah Bony u la ong ruh ba ïa katei ka lynti ïaid kjat dang shu dep shna kumba ar snem mynshuwa. La siang da ki maw kyrdon kiba ka tnad jngohkai pyrthei ka la thied ïa ki naduh Sohra bad la wan kit da ki trok shaduh Mawphanlur bad wat hadien ba la dep shna ruh, na ka liang ka tnad jngohkai pyrthei kam shym pat la plie paitbah ïa katei ka lynti ïaid kjat.
“Ha shilynter jong katei ka lynti ïaid kjat, ki don ki jaka shongkai pyngngad kiba la shna itynnad bha hynrei ha kine ki sngi ki la kylla long tang kum ki jaka rieh slap jong ki blang ki masi. Ka jingpynlut pynsep jong ka, tnad jngohkai pyrthei ha kaba shna ïa katei ka lynti ïaid kjat bad ki saw tylli ki jaka shongkai pyngngad, ka la poi sha ki phew lak lada shu antad”, u la ong.
“Hynrei lada katei ka tnad treikam jong ka sorkar kan shu pynlut kai ïa ka pisa khlem da ai bor ha uno uno u nongshong shnong ba un peit bad sumar, khnang ba ki nong jngohkai pyrthei kin smat ban ïaid kai pyngngad lyngba katei ka lynti ba la dep shna kam don jingmut satia. Ka long ruh kaei kaei ka bym lah ban pdiang ïa ka jingleh jong ka tnad jngohkai ba ynda la dep shna sa phah pynjot noh khlem pat da plie paitbah”.
“Kumba ka long mynta imat ka jingput turoi jong ka sorkar, ba kan thaw ki lad ki lynti ban kyntiew ïa ki kam jngohkai pyrthei na ka bynta ba ki nongshong shnong kin kiew ha ka ïoh ka kot ka kamai kajih, ka dei tang na ka bynta ban pynmyntoi ïano re kiba don jingïadei bad ki heh sorkar, katba ki paitbah nongshong shnong ki bym tip ei ei ki shu im jynjar shilynter”, u la ong.