Da ka Wheel Chair noh synñiang u Bah P.S. Lyngdoh bad ki paralok ïa u Heprit ba duna dkhotmet

Mawkyrwat, Jymmang, 18: Ka long kaei kaei kaba ai mynsiem na ka bynta ki briew kiba don ka jingduna ha ki dkhot met kiba don ha kylleng ki jaka ha kaba uwei na ki samla Rangbah ka Bri u Hynñiewtrep na ka Shnong Phlangmawprah, kaba hap hapoh jong ka Hima Langrin Syiemship jong ka South West Khasi Hills District watla u dei na ka thaiñ Nongkyndong hynrei u la long ka nuksa kaba bha tam na ka bynta ka imlang sahlang kum u samla uba ju angnud ban pynkylla dur ha ka imlang sahlang da kaba u ju ïai kren ïa ki mat ki jura ym tang katta u la ïoh ruh ban noh synñiang ïa u u duk u suk u sem shilliang kup shilliang lyngba ka YouTube Chennai P.S. Lyngdoh.
Halor kane ka kam ba bha ha ka 12 tarik u Jymmang u la ïoh ban ai sngewbha da ka ‘Wheel Chair’ ïa iwei i khynnah ba don jingduna ha ka thaiñ West Khasi Hills District da kaba u pynlut hi da la ka jong ka pla lade bad katto katne ki jingaimynsiem bad kyrshan lang da ki paralok jong u.
Haba ai jingkren ha ki lad pathai khubor u la ong, “Nga don ka jingsngewkhia bad ka kamram ruh ban ïarap bad kyntiew ïa ki paradoh parasnam ba don kam ïa ka kti kamon kadiang jong ngi ban leh ei ei na ka bynta ka imlang sahlang. Namarkata, lyngba ka kamai ba ïoh na ka YouTube bad lem ka jingsnohktilang ki paralok ngi lah ïoh ban noh synñiang ïa iwei na i heprit bym lah ban ïaid ban ïeng naduh ka rta ba 6 snem da ka u la buh ruh ka jingthoh sha u DC West Khasi Hills District ba kin shimkhia ban pynrung ïa ine heprit hapoh ka jingpeit ka tnad Social Welfare namar lah 7 snem mynta ym shem la don kino kino ki lad jingïarap na ka sorkar. Bad khyndiat shaphang ine heprit ka jia kumne ka dei hadien ba ïoh kem pang naduh ka rta ba dang rit ha ka por ba u la sdang leit skul.
Ka jingleit ai jingïarap jong u bah P.S Lyngdoh bad ki paralok kam dei tang ha kane ka kynti ba mynta hynrei ki ju leit ruh ha kiba bun ki jaka ban ai mynsiem bad noh jingïarap lyngba ka song pisa bad kiwei de ki lad ki lynti bad nangne shakhmat kin nang ïai bteng ruh namar nga shim ïa kane ka bynta kum kawei na ki lad ban wanrah ka jingïaieid ïatylli hapoh ka Jaidbynriew bad ban long ruh ka nuksa ba kumba ka ktien ka ong, “Haba phi ïoh ki jingkyrkhu na U Blei wat long kiba im pahuh tang ïa lade hynrei im da ka jingim ryngkat ka mynsiem ban ai lem ïa kiba donkam jingïarap,” ong u P.S. Lyngdoh.
Hadien ba u bah P.S. Lyngdoh u la ïoh ban leit ïa kynduh ïa utei u Heprit u la buh ruh ka jingkyrpad ïa ka tnad ophis ka Social Welfare ban ai jingïarap kum ka bai bam kumba kiwei kiba don jingduna dkhot met ki ju ïa jingmyntoi ha kajuh ka por mynta ka sngi u la ïoh ruh ban phah da ka jingthoh sha u Deputy Commissioner jong ka West Khasi Hills District bad halor kane na ka liang ka ophis jong u DC ruh ki la shim khia halor kane ka bynta na ka bynta utei u heprit.