Jowai, Jymmang 18: Ka Mihmyntdu Community Social Welfare Association (MCS-WA) Targeted Intervention (TI), Injecting Drug User (IDU) Jowai kaba hap hapoh ka Meghalaya AIDS Control Society ha kane ka 17 tarik u Jymmang kala pynlong ïa ka prokram ai jinghikai ban ïada na ka jingngop ha ki jait jingdih pynbuaid ha kylleng ka West Jaiñtia Hills.
Ïa kane ka prokram la pynlong ha Thomas Jones Synod College, Jowai ryngkat ka jingïatreilang jong ka District Social Welfare Officer, katba ïa ka jingïalang la pynïaid da ka kong S. Meliora Lamare, Program Manager of MCSWA TI –IDU Jowai.
Na ka liang ka kong J. Synnah ka District Social Welfare Officer ka WJH District haba ai jingkren kaba ai ka jingïaraoh ïa kane ka kynhun treimon sngewbha kaba la pynlong ïa kum kine ki prokram ai jinghikai hapoh ka District, kaba long shi bynta ban ai jinghikai ïa ki khun samla ba kin lait na ki jingmlien ba sniew hapoh ka imlang sahlang.
Kala pynsngew ruh shaphang ki lad jingïarap na ka sorkar kiba lah ban ïoh da kaba apply kum ka ‘Child Welfare Scheme, Women’s Welfare Scheme, bad ka Scheme na ka bynta kiba don jingduna ha ki dkhot met (Disability) da kaba ong ba ka sorkar kala ithuh haduh 21 jait ki rukom duna ha ki dkhotmet.
Ha ka juh ka por ka khot ïa ki samla pule ban kin long kiba shemphang ha ka jingnang jingstad da kaba ym dei ban ngop ha ki jingsniew kiba bunjait ki jingdih buaid, ka jingarmet ha ka rta ba dang rit, bad kiwe de.
Na ka liang ka kong Rinibeth Patlong, Program Manager of MCSWA TI- CC kum ka nongai jingbatai bniah kala pynsngew shaphang ki jingeh kiba lah ban mih na ka jingkyrni ïa ki jingdih pynbuaid bad kala batia ruh shaphang ki lad jingsumar ïa ki nongpang kiba ngop ha kum kine ki jingsniew.
Kiwei de kiba ai jingkren ha kane ka sngi ki kynthup ïa ka kong Dr. JN Shullai kaba la pynsngew shaphang ka rukom treikam bad ka jingai jingshakri jong ka MCSWA kum ka kynhun treimon sngewbha ban wanrah ïa ka bha ka miet, da kaba ong ruh ba kane ka kynhun ha u bnai ban wan June, 2022 kan kynjoh sha ka jingdap 40 snem ka jingshakri.
