Da ka Vision 2032 buh thong ban kyntiew naduh ka koit ka khiah, ka rep ka riang bad kamai kajih

Shillong, K’Lyngkot 16 : Ka jingïalang ba nyngkong jong ka Kynhun Myntri ha Sohra kaba dang shu lah shen ka la shim bun tylli ki rai na ka bynta ban kyntiew ïa ka Jylla la ka long ha ka koit ka khiah, ka rep ka riang, ka kamai kajih, ka bording, ka ri jingri, ka umbam umdih, ka ri dohkha, ka ïohkam ïohjam bad ruh haba ïadei ban pynneh pynsah ïa ki khlaw ki btap.
Ïa kine ki mat ïatai la kren ha ka Cabinet Retreat kaba la don naduh u Myntri Rangbah, ki Myntri Sorkar bad ki ophisar rangbah jong ka jylla.
Kumta kum shi bynta jong ka Vision 2032, baroh ki tnad sorkar ki la ïatai bniah bha bad shim ruh ïa ka rai na ka bynta ban kyntiew ïa ka jylla ha ki liang baroh.
Animal Husbandry and Veterinary Department – Kane ka tnad ka la pyntreikam ïa ka jaka shohdoh kaba paka bha ha Mawiong bad kumjuh ha Demthring Jowai da ka thong ban pyntikna ba ka doh kaba la dep shoh doh kan long kaba khuid bad shngain na bynta ki nongbam. Nangta la pynjur ruh ïa ka jingpynmih ïa ki phlang ban bam ki mrad sha ka 2709.9 ton lyngba ki jaka rep ba la pynheh shuh. Ka Piggery Mission ruh ka la long kaba seisoh da kaba ïoh ban pyiar haduh 365 tylli ki cooperative society. Bad da ka jingpyntreikam ïa ka CM-Elevate Programme kane ka la nang kyntiew shuh shuh ia ka ri sniang, ri syiar bad ri blang ha kylleng ka jylla.
Public Health Engineering Department – Kane ka tnad kum shi bynta jong ka Vision 2032 ka la trei borbah na bynta ban pynpoi umbam umdih ha baroh ki longiing nongkyndong. Lyngba ka Jal Jeevan Mission ki la don palat 5.29 lak tylli ki Functional Household Tap Connections (FHTCs) kiba la dep ban kyntiew ïa ka rukom ai um. Ki la don ruh kumba 3,436 ki jaka ba tan um lane ki intake structure, nangta 7,797 tylli ki jaka pynlang um bad 3,366 tylli ki jaka pynkhuid ïa ka um kaban pyntikna ba ka um kaba sam sha ki paidbah kan long kaba khuid bad kaba biang.
Fisheries Department – Kane ka tnad ka la trei borbah bha da kaba don mynta haduh 5,439 hectare ki pung dohkha kaba la ïarap ban kyntiew ïa ka jingpynmih dohkha kaba la kot sha ka 20,000 ton. Nangta la ong ba mynta ki la don haduh 83 tylli ki jaka ri dohkha bad kumba 26 tylli na ki la jied ba kin long ki jaka ban pynneh pynsah ïa ki dohkha kiba kham phylla bad symbai tynrai. Ka tnad ka la pynbha ruh mynta sa kumba 9 tylli ki jaka jngohkai ba don bad ki pung dohkha, da kaba buh hakhmat ban kyntiew lang ïa ka kamai kajih bad ruh na bynta ka mei mariang.
Labour, Employment, and Skill Development Department – Kane ka tnad ka la pynkiew ïa ka jingdon ki jaka pule ha ki ITI da palat 110 persen bad ïoh ruh haduh 95.91persen ka jingpas ha ka All India Trade Test 2023. Hapoh ka Skills Meghalaya, la ai jinghikai ïa palat 20,000 ngut ki riew shimet, ha kaba ki don 4,900 ngut ki nongïoh jingmyntoi kiba la la bynta ban seng kam lajong. Ka tnad ka la seng ruh 12 tylli ki Production Hub, ka la kyrshan ïa 14 tylli ki kolej kiba don ka vocational training, bad ka la pynsuk ïa ki paidbah ban ïoh kam shabar ri na ka bynta 56 ngut ki briew . Ki la don ruh haduh 4931 ngut ki nongïoh jingmyntoi da ki tiar sdang treikam kiba kot sha ka 1.97 klur.
Forest and Environment Department – Ka kam ba kongsan jong ka tnad ka long ka jingplie ïa ka Meghalaya Biological Park ha umtrew, Ri-Bhoi District, kaba kyntiew ïa ka jingpynneh pynsah ïa ki jingthaw ba im. Ka tnad ka la thaw 109 tylli ki Community Reserve, ka la ai ruh kumba 238 tylli ki jingbit ban tih marpohkhyndew, bad sam ruh haduh 492.48 lak kum ka jingïarap na ka bynta ki nongshah pynjulor ha ki mrad khlaw ha ki san snem. Ki la don ruh 2 tylli ki Sanctuary ba thymmai (ki bynta jong ka Bahgmara RF bad Riat Khwan RF) kiba la mynjur da ka State Board for Wildlife. Nangta la plie paidbah ruh ïa ka Meghalaya Forest Fire Information System ban pynkhlain ïa ka jingïada ïa ki khlaw ki btap.
Power Department – Ka tnad bording ka la lah ban pynduna ïa ka jingduhnong jong ka AT&C na ka 32% sha ka 16.12% bad ka jingthut jong ki transformer sam bording na ka 5.55% sha ka 4.61%. La ïathuh ba ki la don palat 1.1 lak tylli ki smart meter kiba la dep ban pyndait bad 36 tylli ki substation ban pynjanai shuh shuh ïa ka jingsam bording. Ki jaka sor bad nongkyndong mynta ki ïoh ïa ka jingpynbiang bording kaba palat 22 kynta man ka sngi, kaba pyni ïa ka jingkiew kaba khraw ha ka jingdon bad jing ïoh pyndonkam ïa ka bording.
Health and Family Welfare Department – Ka tnad ka Koit ka Khiah ka la lah ban pynduna 53% ka jingïap jong ki longkmie bad 38% na ka jingïap jong ki khunlung hapdeng u snem 2020 bad 2024. La pyntreikam ruh ïa ka Results-Based Financing (RBF) ha ki 69 tylli ki PHC, 20 tylli ki CHC, bad kiwei kiwei ki jaka sumar . La dep ban sam ruh haduh 50 klur tyngka na ka bynta ban pynjanai shuh shuh bad pynshlur ïa ki longkmie ban leit kha khunlung ha ki jaka sumar. Nalor kata, ki la don haduh 11 tylli ki CHC ba la kyntiew kyrdan sha ki First Referral Unit (FRU), bad la pynbiang ïa ka jingtreikam jong ki Ultrasound sha ki 60 tylli ki jaka sumar ha kylleng ka jylla.
Department of Social Welfare – Da kaba pynleit jingmut bha ha ka jingbam ba tei met, ka tnad Social Welfare ka la pynduna ïa ka jingdon ki jingpang duna bam ne ka Severe Acute Malnutrition (SAM) na ka 6.5% sha ka 4.7% bad kumjuh ïa ka Moderate Acute Malnutrition (MAM) na ka 15.3% sha ka 12.1%. Ka Meghalaya Early Childhood Development Mission (MECDM) ka pynthikna ïa ka koit ka khiah na ka bynta ki khynnah kiba don ha ka rta 0 –8 snem. Shuh shuh, ka jingthmu ba thymmai jong ka DREAM ka long ban ïakhun pyrshah ïa ka jingdih buaid kum u drok lyngba ka jingïatreilang bad ki shnong ki thaw bad lyngba ki prokram pynsngewthuh paidbah.
Agriculture Department – Ka tnad ka Rep ka Riang ka la lah ban kyntiew ïa ka jingpynmih ïa ki mar rep ba kongsan kum u Sying, shynrai, ki musla (cardamon) kaba la wanrah ïa ka jingïoh jingmyntoi jong palat lak ngut ki nongrep. Ki jingthmu ban pynïar ïa ka jingshakri ki kynthup ïa ka jingbuh ïa palat 110 tylli ki Custom Hiring Centre, 197 tylli ki jaka die lang (Collective Marketing Centres), 166 tylli ki jaka shnabad pynmih ia ki jingbam (Processing Units), 120 tylli ki jaka buh marbam, 50 tylli ki jaka buh ïa ki marbam ba ki ym pyut bad 50 tylli ki ïew. Ka tnad ka la pynheh ruh ïa ki kper kophi ha ka jingeh kaba 900 hectare da ka thong ban kyntiew shuh shuh ïa ka kamaih kajih naka rep ka riang.
Water Resources Department – Kane ka tnad ka la lah ban ïoh ïa ka jingjop da kaba lah ban pynpoi um sha ki 3,059 hectare bad pynbha pat ïa kumba 48 tylli ki hydromet station. La shna haduh 2,000 tylli ki jaka pynlang um, kaba la ai jingmyntoi ïa kumba 28,300 ngut ki nongrep. Ka tnad ka la pynleit jingmut ruh na bynta ban pynneh pynsah ïa kumba 25,886 hectare ki jaka khlaw na bynta ban pynneh ïa ka tyllong um.