Tura, K’ Lyngkot 18: Ka College of Community Science, Central Agricultural University (Imphal), Tura, Meghalaya, hapoh ka jingïatreilang bad ka ICAR-NINFET Kolkata, ICAR-CICR Nagpur, Deendayal Research Institute, bad ICAR-CRIJAF Barrackpore, ka sngewbha ban pyntip ba ka la plie ïa ka official poster na ka bynta ka National Symposium on “Threads of Heritage: Exploring Traditional Textiles and Natural Fibres,” ka ban sa long shen kata ha ka 27 tarik mynta u bnai haduh ka 29 tarik, 2025, ha ka College of Post-Graduate Studies in Agricultural Sciences, Umïam, Ri-Bhoi District, Meghalaya.
ïa kane ka poster la pyllait paidbah ha ka jingïalang bad ki lad pathai khubor kaba la long ha Conference Hall, College of Community Science, CAU (Imphal), Tura, Meghalaya ha kaba la pyntip ïa ki jingthmu bad ki jingdonkam jong ka jinglong kyrpang kane ka prokram.
Kane ka symposium kan ai ka jingshakri bad kumjuh ruh kum ka rynsan ban kyntiew ïa ka jingriewspah jong ka India haba ïadei bad ki kam thaiñ jaiñ bad kiwei kiba long ka jingkyntiew ïa ka ïoh ka kot jong ka ri hi baroh kawei bad khamtam eh ka jingkyntiew ïa ka kam karkhana pynmih ksai.
Kane ka symposium ka batai ruh halor ki kam karkhana kiba la pynleit jingmut kyrpang halor ki kam ba la trei kiba kynthup ïa ki kam rep kum ka jingthung ïa ka kait, u sohtrun, u seij bad kiwei kiwei. Kane ka prokram ka thmu ruh ban lum lang ïa ki riewshemphang, ki artisan, bad kumjuh ruh ki nongthaw aiñ ki ban pynphriang ïa ka jinghiar pateng jong ka kam thaiñ jaiñ bad ki kam ban pynneh pynsah ïa ka jingkiew ha ka ïoh ka kot.
Ha kane ka prokram na ka liang ka Dr. Jyoti Vastrad, Dean of the College, ka la ïathuh halor ki kam kiba kongsan haba ïadei bad ka jingrep ïa u ksai bad ka jinghiar pateng jong ka, ka ban ithuh ïa ka ïoh ka kot jong ka ri India kiba long kiba kongsan ban pynneh pynsah bad ki jingdonkam ban kyntiew ha ka ïew ka hat ha kane ka ri.
Na ka liang jong ka, ka la ong ba ka jinghiar pateng jong ka kam rep ïa u ksai ka long kaba kongsan bha ym tang ba kan pynneh pynsah ïa ka jinghiar pateng hynrei ka kyntiew ruh ïa ka ïoh ka kot jong ka ri. “Kane ka symposium ka wad ruh ka jingïarap na ki riew shemphang, ki nongwad bniah bad kiba sengkam lajong ban kyntiew ïa ki jingshem thymmai bad kiwei ki kam kiba kongsan,” ka la ong.
Ki mat kiba kongsan ha kane ka Symposium ki long ha ka Technical Sessions & Panel Discussion, kaba kynthup ïa ki nongkren kiba shemphang halor kane ka kam bad ka la don ruh ka Cultural & Textile Exhibition, ka Skill Development & Business Networking nalor ka jingkhot ban shim kam ha kaba ïadei bad ki kam rep ha kane ka thaiñ kiba long kiba kongsan.
