Da ka song pisa ba 1 lak ai sngewbha u MLA Shillong South ïa i Mei-ieid Kmoin shwa ba in leit mareh sha Australia

Shillong, Naitung 16: Hadien ka jingphriang ki khubor ba i Mei-ieid Kmoin Wahlang ha ka rta kaba 76 snem i pynkhreh mynta ban leit aireng sha Australia ha ki san tylli ki jingiakob mareh, na ka liang u MLA ka Shillong South, Bah Sanbor Shullai ha ka janmiet sngi Ba-ar u la ai sngewbha da ka song pisa kaba Shi Lak tyngka kum ka jingkyrshan ia ka jinglut jingsep jong i.
Ha kane ka jingialang pynkup burom, u Bah Sanbor u la ai sngewbha ruh 30hajar tyngka ia u coach jong i, u Bah Beningstar Lyngkhoi kum ka dak ka jingithuh ia ka jingaiti met bad mynsiem jong u ban iarap ia i mei-ieid ha katei ka jingpynkhreh.
Na ka liang u Bah Sanbor haba kren ha ka jingialang kaba lyngkot kaba long ha kamra treikam jong u ha Secretariat u la ong ba u dap da ka jingkmen kaba khraw ban tip ba ine i Mei-ieid ha ka rta kaba 76 snem i dang lah ban ioh mihkhmat ia ka Jylla Meghalaya bad khamtam ia ka ri India ha katei ka lympungbah ba tip kum ka Pan Pacific Master Games, 2024 ka ban long ha Gold Coast, Australia.
Ha kajuh ka por u pynpaw ruh ia ka jinglyngoh ba watla i la don haduh 16 ngut ki khun (12ngut mynta) bad 54 ngut ki khun ksiew hynrei ka mynsiem ia khun pat ka dang long kum ki khynnah samla.
“Kane ka jingai sngewbha ia phi ka dei kaba nga ai na ka tulop kaba nga ioh 2.03lak tyngka shibnai,” ong u Bah Sanbor.
Shwa kane, u Bah Beningstar haba kren bad u Mawphor u la iathuh ba man ka step itei i mei-ieid i ju pynlut por beit ym duna ia ka 2 kynta ban kilan met.
Haba jubab halor ka jingkylli u la ong, “Lada ia kren ia ka bor met lehse ha ka jingiakob mareh ka bor jong i ka dang ia ryngkat bad kiba 30 snem shaneng. Lada ia kren lei lei bad kiba 50 snem shaneng i dang khlaiñ ma i shibun,” u la ong.
Kumban shu kdew hangne ine i mei-ieid i la ju leit ban shim bynta bun bha ki lympung iakob mareh kiba long kylleng ka ri India bad i la wanrah ruh bun ki takma ksiar, takma rupa na bynta ka jylla.
Ine i Mei-ieid in leit ban shim bynta ha ka lympung mareh kaba 800mitar, 1500 mitar, 3000 mitar ha ka thup ki nongiamareh ba 75 snem shajrong.
Haba pynpaw ia ka jingkmen kaba khraw ba i ioh ia katei ka jingkyrshan na u MLA ka Shillong South, i Mei-ieid Kmoin i la ong ba kane ka la nang ai mynsiem bad ai jingkyrmen shuh shuh ba i lah ban lehbha ha katei ka lympungbah kaban long ha Australia shen.