Jowai, Naitung 07: U Myntri ka thad pule puthi ka sorkar jylla uba long ruh u MLA ka 7 Amlarem Constituency u ma Lahkmen Rymbui ha ka sngi saitjaiñ 4 tarik u Naitung, 2026 ula aiti ïaka Government Secondary School kaba dang shu seng thymmai hapoh ka Rashtriya Madhyamik Shiksha Abhiyan (RMSA) sha ka shnong Jongushen hapoh ka Amlarem Sub-Division.
Ka jingseng ïa ka Secondary School ha katei ka shnong ka long kum u mawjam ba kongsan ban pynïar ïa ka pule puthi sha ki khynnah skul ha katei ka thaiñ. Ka Shnong Jongushen kala don lypa ïa ki Skul Lower Primary bad Upper Primary bad ka jingpynrung ïa ka Secondary School kan plielad ïa ki khynnah ban bteng ïa ki jingpule Secondary jong ki hapoh ka shnong.
Ha kane ka prokram la wan ïashim bynta da u Headman, u Secretary shnong, ki dkhot ka Village Education Committee, ki nongïalam shnong, ki kmie ki kpa, ki nonghikai, ki khynnah skul bad kiwei de kiba la shah khot sngewbha.
Haba ai jingkren u Myntri ula pynpaw ba ka pule puthi ka dang long ka mat ba kongsan tam jong ka Sorkar bad ka dei ka atiar kaba khlaiñ tam ban pynkupbor ïa ki nongshong shnong bad ban pynkylla ïa ka imlang sahlang. Ula ong ba ka jingplie ïa ka Secondary School kaba thymmai ka pyni ïa ka jingshimkhia ba khlem artatien jong ka Sorkar ban pynthikna ïa ka jingïoh ïa ka lad pule kan long kaba ïaryngkat ha ki jaka nongkyndong bad ki jaka sor.
Shuh shuh u Myntri ula ai ka jingïaroh ïa ki nongïalam shnong bad baroh kiba la noh synñiang ban seng ïa kane ka skul, ula ong ruh kane ka jaka pule ka ïeng kum ka dak jong ka jingkyrmen bad ka lad na ka bynta ki pateng ban wan. Ula pynpaw ka jingsngewskhem ba kane ka skul kan don ka bynta kaba khraw ha kaba kyntiew ïa ka pule puthi jong ki khynnah ka shnong Jongushen bad kiwei de ki shnong ba marjan.
La pynkut ïa ka prokram da ka jingaiti lut ïa katei ka Govt. Secondary School (RMSA) sha ki nongpynïaid jong ka skul.
