Da ka School Bus, aiti ki heh jong ka Company Dalmia Cement ha u WS Thangskai na ka bynta ki khynnah skul

Khliehriat Lber 13 : Kum ka jingnoh syniang sha ka shnong ka thaw, ki heh jong ka company dewbilat, ka Dalmia Cement Ltd, Thangskai, East Jaiñtia Hills District,lyngba ka tnat CSR, mynta ka sngi ki la aiti kawei ka School Boss ha u Waheh Shnong jong ka Thangskai, East Jaiñtia Hills District, na ka bynta ka jingbit jingbiang ki khynnah skul ha ka leit ka wan, kiba ju leit skul shaduh Khliehriat.
Haba kren kum u kongsan ha ka jingïalang, u Unit Head, DCBL, u Raju Ranjan, u la ong ba kane ka school bos kan ngiam haduh 18 ngut ki khynnah kiba ju leit skul sha Khliehriat bad kane ka dei kawei na ki jingnohsyniang sha ka imlang ka sahlang, kumjuh ruh kan ïarap shi katdei eh ïa ki kmie ki kpa kiba phah skul ïa ki khun sha jngai, ha kaba kim donkam shuh ban pynlut pisa ha ka bai leit bai wan jong ki khun, namar ki khynnah kiba shnong da kane ka bos kim donkam ban siew pisa.
Kiba la ïa don ryngkat ha kane ka jingïalang ha Thangskai, ki kynthup ruh, u Plant HR Head, DCBL Unit, u Dinesh Kumar Bharadwaj, u Secretary Shnong Thangskai, u bah Kison Dkhar bad kiwei kiwei.
La ong ruh ba kiwei kiwei ki kam ba ka company ka la dep leh kum shibynta ban kyntiew ïa ka shnong, ki kynthup ruh ka jingshna ïa ki lynti ïaid kjat (footpath) ha rud ka surok national highway ban pynsuk ïa ki briew kiba ïaid kjat, la shna ïa ki jingkieng ïaid kjat hapoh shnong, ki lynti ïaid kjat hapoh shnong, la dep buh ruh ïa ki solar street light ha shnong, ka tnat CSR jing ka company la ju pynlong ruh ïa ki prokram sam dawai ei sha ki paidbah (Free Medical Camp), ka la lah ruh ban pyndep ïa ka jingai jinghikai ïa ki briew ha ka kam Beautician, ha ka kam suh jaiñ bad kiwei kiwei ki jait kam ki ban ai jingmyntoi ïa ki ha ka ïoh ka kot bad ka kamai kajih.