Shillong, Nailur 17: Na ka liang ki shipai ka 119 Territorial Army, ki la pynlong ïa ka rally ïaid thuk thuk ha ka sien kaba 40 na Kenches Trace sha Cherapunji bad wanphai biang kum shi bynta ban rakhe ïa ka Platinum Jubilee.
Katkum ka kyrwoh ka khubor la ong ba ïa kane ka rally ba la pynlong ha ka 15 tarik u Naiwieng, ka la pyni ym tang ïa ka jingïatreilang bad ka jinglong ryntih jong ki shipai Territorial Army hynrei ruh ka jingaiti jong ki ha ka jingïadei bad ka imlang sahlang bad ka jingleit shangkai sawdong sawkun ha kane ka jylla.
Shuh shuh ha kaba iadei bad kane la ong ba kane ka rally ka la sdang naduh ka por mynstep na Kenches Trace bad ki nongñiah thuk thuk ki la ïaid lyngba ki jaka bad ki surok kiba kyllaiñ, ban poi sha Cherapunji. Ka jingwan phai ruh ka la long kaba pynkmen kumjuh bad la pynkut da ka jingpdiang sngewbha ha Kenches Trace.
Kane ka rally ka thmu ban wanrah ïa ka jingïadei paralok hapdeng ki nongïashim bynta, ban kyntiew ïa ka mynsiem jong ka jingïalehkai, bad ban pyni ïa ka jinglah treikam jong ka kynhun shipai jong ka thaiñ. Ka long ruh kum ka rynsan ban ïakynduh bad ki nongshong shnong bad ban pynskhem ïa ka jingïadei hapdeng ki shipai bad ki paidbah.
Ha kane ka prokram u Colonel Devashis Nailk, Commanding Officer ka 119 Territorial Army u la pynpaw ka jingsngewnguh ïa baroh ki nongïashim bynta bad ki nongkyrshan: “Ka rally ka la long kum ka jingpynshisha ïa ka jingtbit bad ka jingaiti lut jong ki shipai ka Territorial Army jong ngi. Ngi sngew sarong ïa ka sap jong ki bad ngi sngewkmen ïa ka jingïatreilang jong ki paidbah kaba kane ka rally ka la wanrah.”
Ka 119 Territorial Army ka ai khublei ïa ki bor synshar shnong, ki nongtrei mon sngewbha, bad ki nongkyrshan kiba la noh synñiang sha ka jingjop jong kane ka jingïalang.
