Shillong, Rymphang 01: Da kaba buh hakhmat ïa ka thong ban leit pynshai sha ki paidbah nongthep vote ka jylla na ka bynta ban jied ïa ki nongmihkhmat kiba kynsai, ka Hynñiewtrep Youth Council ha ka sngi Balang, ka la pynbna ban sa pynlong da ka ‘Rai Eh Daw Campaign’ naduh ka 6 tarik mynta u bnai da kaba sdang shwa na Motphran, Shillong.
Ha ka jingïakren bad ki lad pathai khubor, u President ka HYC u Bah Rober June Kharjahrin ula ong, “namarba ki paidbah ki la shah ïalam bakla ha ka spah ka phew, ka kyiad, ka jingsngew niam, jingsngew dong sngew thaiñ bad kumta ter ter ha kaba kut uta u symbai u pynmih ïa ka jingsniew da ki phew shah ïa kaei kaba ngi bet.”
“Haba ngi jied ïa ki nongsynshar da ka lynti ka bym dei, kan pynmih ruh ïa ki nongthaw aiñ lane ki nongsynshar kiba tam da ki phew shah ka jingsniew,” u la ong.
“Ngi hap ban shim ïa ka jingkitkhlieh kum ki briew ban pynthikna ba ngin ïoh biang ïa ka synshar ka khadar kaba khuid ba suba,” u la ong bad bynrap, “namarba ngi la rai jemdaw ngim shym la lah ban pynlong shibun ki mat ki jura. Ngi kyntu ïa ki paidbah ba ngin rai pyneh daw ïa ka jaidbynriew jong ngi bad ngin rai da ka jingkitkhlieh bad ban kiar noh ba ngi hap ban jied ïa ki nongmihkhmat jong ngi da ki sbai rupa, da ka jingsngew shongshit. Kaba kongsan eh ngin rai da kaba pynshong nongrim ïa ki mat ki jura kum ka jingdawa ïa ka ILP, ka jingpynrung ïa ka ktien Khasi ha ka Khyrnit Baphra, u pud u sam, ka khuid ka suba, ka jingdawa ban pynïoh ïa ka hok jong u Bah Cheristarfield Thangkhiew, u pud u sam bad kumta ter ter.”
U la ïathuh ba ka seng kan sa pynphriang ruh ïa kane ka jingpynsngewthuh paidbah da kaba pyndonkam ïa ka rynsan jong ka Social Media da kaba pyllait ïa ki jingrwai, ki poster, ki kot lyngkdop.
“Ngi kyntu ïa ki paidbah ngi dei ban shim ïa ka jingkitkhlieh nyngkong eh ban pynkhuid ïa ka synshar ka khadar kaba la nang hiar na ka por sha ka por bad ban shim ïa ka jingkitkhlieh ban jied ïa ki briew kiba la biang ka ryngieng ka ryniot, ka akor ka burom, ka jingnang ka jingtip,” la kyntu une u nongïalam ka HYC ïa ki paidbah.
Haba kylli u la ong ba ki jingdawa jong ka seng kim dei shuh tang ha por ba dang synshar ka Sorkar Meghalaya Democratic Alliance (MDA) hynrei ka jingdawa ïa ka ILP, u pud u sam, ka jingdawa ban pynrung ïa ka Ktien Khasi ha ka Khyrnit Baphra kine kim dei shuh ki mat ha ka por jong ka Sorkar MDA, hynrei ki la dei naduh mynshwa.
“Kane ka jingpynsngewthuh paidbah kan ym dei ka pro-party (ïashah party) lane ka (anti-Party) ïashah party ïano ïano, hynrei ngi pynshong nongrim ba lada ki paidbah ki jied ïa ki nongsynshar kiba biang, ka synshar ka khadar ruh kan biang,” u la ong.
“Ngim dei ban shu shah pynbiej shisien ha ka san snem hyrnei ngin jied da kaba thikna da kaba pynshong nongrim ïa ki Manifesto ba ki party ki la tyrwa bad ki la khlei,” la ong shuh shuh u Bah Robert bad bynrap ba ka elekshon kam dei satia ka tamasa kaba shisien ha ka san snem hynrei ban pynkylla ïa ki nongmihkhmat ki bym treikam bad ban kmen ba ka Riti Synshar ka ailad ban bujli thymmai ïa ki nongmihkhmat shisien san snem.
“Ka seng kan burom ïa ka mon laitluid jong u paidbah bad ngi kwah pynkynmaw ïa u paidbah haba phi pynshong nongrim ban jied, kawei, ki dei ban sngewthuh, ka dei ka hok ban ïoh thep vote, kaba ar, ka dei ka kamram ban pyndep, kaba lai, ka dei ka por ba ki paidbah ki aiti bad ki pynkhamti ïa ki nongsynshar bad ki nongthaw aiñ halor jong ngi san snem,” u la ong bad bynrap, “ban aiti kat ïa ka bor synshar, kam dei satia ka kam kai kaba ïa ryngkat bad ka shi peg ar peg, ka laiphew sawphew hajar, ne iwei i kombor, iwei i shatri, iwei i pliang, iwei i pela ne ban ïaryngkat bad iwei i sniang khun ne syiar khun.”
Shuh shuh u la ong, “lada ngi ki sengbhalang ngi sngap jar ban shu ieh kumto, ai kin ïa jied katba mon, kaba ma ka long ba ïoh ngi mad ïa ki jingeh jingjynjar bad kaba ma ka long ïoh ba ki bahaing hasem jong ngi, kin nang shah siat ïap na ka por sha ka por ha ki bor jong ka aiñ bad kan poi ka por kaba ma kumba la ong da ki nongthaw aiñ ba kin shim GST wat ïa ka hok ban kren. Lada buh GST wat ïa ka hok ban kren, ka mut ka hok ban kren, kaba dei ka Fundamental Right ruh kin weng noh.”
