Nongpoh, Lber 26 : Ka kynhun ki nongñiah thuk thuk bala tip kum ka The Ultimate Legend Bikers Association (TULBA), Eastern Zone hynnin ka sngi kila pynhap pyrda noh ïaka lympung ïalehkai phutbol ki kynthei bala tip kum ka Women Open to All Knock-Out Football Tournament ha madan ïalehkai ka shnong Umeit ha Ri-Bhoi, hadien ba 2 tylli ki kynhun kila poi shaduh ka thup phainal jong katei ka lympung. Ïa katei ka lympung ïalehkai phutbol la leit ban pynhap pyrda da u Bah Samborlang Diengdoh bad u bah Nobitson Kharlynnai ki riew rangbah na katei ka thaiñ, haka jingdonlang u Bah Bandari Ryntathiang President ka CoRP, ki nongïalam jong ka seng TULBA bad kiwei kiwei ki riew rangbah.
Ka jingïakhun phainal ha katei ka sngi kala long hapdeng Max XXI FC pyrshah ïaka Lynti Jam Football Center ha kaba ka jingïakhun kala long kaba itynnad bad ïakhaid bha, hynrei hapdeng ka jingïakhun kaba jur ban ioh rah ïaka nam lahduh ka Max XXI FC kala lah ban pynliem noh ïaka kynhun Lynti Jam da 2-0 ban rah syndon ïaka nam lahduh jong katei ka lympung.
Ka jingthmu jong ka seng TULBA ban pynlong kum katei ka lympung ka long ban pynshlur ïaki samla da ki jinglehkai bad kiar lai lum lai wah naki jingdih ba sniew khamtam u drok u ba la jyllei ha kylleng sawdong ha kine ki sngi wat sha ki shnong nongkyndong kaba long ka jingma kaba khraw khamtam ïaki khynnah kiba dang khie dang san.
Na ka liang ka seng TULBA kala sam ruh da ki khusnam ha katei ka sngi sha ka kynhun kaba jop bad kumjuh ruh kaba rem.
