Shillong, Lber, 24: Ka CMC Mawiong kaba hap hapoh ka jingpeit jingkhmih baroh shikatta da ka St. Dominic Savio Church Mawlai Parish ha ka sngi U Blei ka Jylla Niam Bah Shillong la kyntiew kyrdan sha ka Parish ba thymmai kaba don la u jong u nongsharai mynsiem rangbah.
Ka Jylla Niam Bah Shillong ka la jer kyrteng thymmai ïa ka CMC Mawiong, ha ka jingplie Parish thymmai kum “Ka Maria ka Syiem U Rosari Bakhuid’ ïa kaba la pynbna da u Archbishop jong ka Jylla Niam Bah Shillong u Most Rev. Victor Lyngdoh da ka jingsynran lang jong u Parish Priest jong ka Mawlai Parish u Rev. Fr. Telesphor Nonglang bad kiwei kiwei ki Lyngdoh Sohblei.
Shwa ban pynlong ïa ka Mass Bakhuid, u Archbishop Victor ha ryngkat ki paid u Blei la ïashim bynta ha ka proseshon u Sla Tlai ban kynmaw burom ïa ka jingrung jong u Jisu Khrist sha nongbah Jerusalem.
U Archbishop Victor kum u kongsan u la aiti ha u Vicar General ka Jylla Niam Bah Shillong u Fr. Richard Manbha Majaw ban pynbna ïa ka Dulir treikam bad u pud u sam jong ka Parish Mawiong.
U Fr. Majaw haba pule paidbah ïa ka Dulir u la pyntip ba u pud u sam treikam jong ka Parish Mawiong u ïakynduh shaduh ka Parish Mawlaingut, Parish Mawprem, Parish Mawlai bad Parish Umbir.
Ki shnong kiba hap hapoh ka jingpeit jingkhmih jong ka Parish Mawiong ki long ka CMC Nongkwar, ka CMC Umjajew, ka CMC Umthlong bad ka CMC Umjapung.
Ïa ka Parish Mawiong la shimti ban peit bad sumar ïa ki khun Khristan Katholic da ki Phadar ka Jingïasyllok Diocesan ne ki Phadar Trai Ri, la ïathuh u Archbishop Victor uba la thung ïa u Rev. Fr. Alfred Lyngdoh Nongbri kum nongsharai mynsiem banyngkong eh jong kane ka Parish.
U Archbishop Victor haba pynkupbor ïa u Fr. Alfred Lyngdoh Nongbri uba la duwai kyntang ryngkat ka kylli ka pyrthew ïa u Nongsharai bathymmai ryngkat ka jingduwai ban phla ïa ka jingngeit jong ki Apostol.
Kumba dei ka bynta ka Balang ban pynkhamti bad ai bor ïa ki Lyngdoh Sohblei; u Fr Alfred u la khlei ïa ka jubanlak da kaba kular ban bud ryntih ïa ki Dulir ba la ai da ka Jylla Niam Bah bad ban ïatrei lang bad ka Balang ryngkat bad ki paid U Blei.
Haba pynkupbor shuh shuh u Bishop Victor Lyngdoh ban pynskhem ïa kane ka kam kum u Nongsharai u ïalam ïa u Fr, Alfred Lyngdoh Nongbri ban dohieid ïa ki sawdong jong ka Duwan bad ka kam ban shong ha Khet Jingphla.
Ka kam ba kyntang tam jong ka jingpynkupbor ïa ki nongsharai jong ka Parish bathymmai ka dei da u Lyngdoh Sad ha kaba u la aiti ïa u shabi jong ka Tabernacle ka jaka ba shong ba sah ka Met bad ka Snam jong U Jisu Khrist ba ladep pynkyntang.
Hadien ka jingpynkupbor na ka liang u Archbishop u la aiti ïa ki kot dulir bad ka jingïasoi ïa ka sakhi satar hapdeng ka Parish Council u nongsharai mynsiem banyngkong.
U Archbishop Victor hadien ka jingpyndep ïa ka deiti lehniam u la plie ïa u Mawnongrim, bad pynher ïa ki baloon bad ka jingot ïa u cake.
