Jowai, Nailur 03: Ka shnong Madanrwai kaba hap hapoh ka Elaka Raliang Laskeiñ Block, West Jaiñtia Hills Ditrict haduh mynta kam pat don satia wat tang ïa ka surok ka ban pynsuk ïa ki paidbah nongshong shnong ha ka leit ka wan bad khamtam ha ka pang ka shitom.
Ki nongïalam jong ka shnong Madanrwai ki la pynpaw ïa ki jingeh ba ki ïakynduh ha kaba ïadei bad ka leit ka wan, ka bah ka kit na ka daw ka jingbym biang ka surok kaba la sniew shaba palat pud mynta da ki phew phew snem.
U Waheh Shnong jong ka shnong Madanrwai u Bah Ciworning Sayoo bad u Secretary u Bah Rithmu Dhar ha u kyrwoh ba la phah sha ki lad pathai khubor ki la ïathuh ba hashwa ban don ka elekshon ki kyrtong ki ju khlei ïa ka jubanlak ban pynshna noh ïa ka surok ha ka shnong Madanrwai hynrei tang shu kut ka elekshon ym don shuh wat uwei ruh uba leit mih sha ka shnong ban sngew ban sngap ïa ka jingeh jong ki paidbah.
Ki pynpaw ruh kumba long mynta lada don kiba pang ba shitom ki hap ban bah ne kit ïa kiba pang da ki briew.
Ki nongïalam shnong ki kyrpad jur ïa u Symbud Myntri Rangbah ka Jylla uba khmih ïa ka tnat PWD (Roads) Bah Prestone Tynsong bad khamtam ïa u MLA jong ka thaiñ ban pynshna noh ïa ka surok.
