Da ka ‘Maverick City Music Live in Shillong’ kaba heh tam yn pynlong ka KJP Assembly ha madan Polo

Shillong, Naiwieng 03: Ka KJP Assembly lyngba ka Mission and Evangelism ka pyntip ba kan pynlong ïa ka Gospel Concert kaba heh, kaba la ai kyrteng “Maverick City Music Live in Shillong,” ha ka 12 tarik u Nohprah, 2026, ha Madan Polo, Shillong.
Ïa kane ka concert ban pynlong da ka KJP Assembly kan long ha ryngkat ka jingkyrshan jong ka sorkar Meghalaya, ka jingpynlong ïa kane programme ne ka Concert ym tang na ka bynta ka prokram rwai Gospel kaba kyrpang ha kane ka aïom Khristmas, hynrei khamtam eh ban pynmih fund na ka bynta ban kyrshan ïa ki project bapher bapher jong ka KJP Assembly kiba kyntiew ïa ka imlang sahlang bad ka bha ka miat jong ki briew ha ka jylla.
Ka Maverick City Music ka dei ka kynhun nongrwai Gospel kaba pawnam na Atlanta, Georgia, USA, kaba la paw nam bha ha ki bynta bapher bapher jong ka pyrthei lyngba ki jingrwai mane bad jingïaroh ïa U Blei.
Kane ka long ka lad ban sakhi ïa kine ki nongrwai Gospel na shabar ri hapoh kane jylla hadien ki nongrwai bad ki kynhun Gospel kiba la paw ha ki por mynshwa, kum u Bob Fitts, ka kynhun tem Petra bad u Don Moen, mynta la don ïa ka kabu ban sakhi live sa shi sien ïa kane ka kynhun nongtem nongput kaba pawnam jong ka pyrthei ka Maverick City Music.
Ha kaba iadei bad kane na ka liang u Rev. S. Diengngan Administrative Secretary KJP Assembly haba kren sha ki lad pathai khubor u la ong, “Ngi ngeit ba kane ka concert kan long ka kabu kaba kyrpang ïa ki paidbah ban ïashim bynta ha ka jingïaroh ïa U Blei lyngba ka jingrwai bad kumjuh ruh ïa ka sap rwai sap tem jong kine ki nongrwai.”
U la bynrap shuh shuh da kaba ong, “Ngi kwah ban pynshai ba ka jingthmu jong kane ka concert kadei kum shibynta na ka jingpynkhreh ka jong ngi ïa kane ka aïom Khristmas bad ruh ban kyntiew ïa ka sap ka phong jong ki khun ka jylla ka jong ngi ha ka tem ka put khristan. Kawei pat ka jingthmu kaba kongsan ka long ban pynmih Fund na ka bynta ban kyrshan ïa ki kam bad ki project jong ka KJP Assembly kiba shakri ïa ka imlang sahlang.”
Shuh shuh la ïathuh ba ka KJP Assembly ka don ïa ki project bapher bapher kiba trei na ka bynta ka jingbha jong ki briew, kynthup ïa ki kam jingïarap ïa kiba donkam jingïarap, ki kam pule puthi, ka jingsumar bad jingïarap ha ka liang ka koit ka khiah, bad kiwei pat ki kam kiba thmu ban wanrah ïa ka jingkylla kaba bha ha ka imlang sahlang.
Kumta, lyngba kane ka concert, la khot ïa baroh ban ïatreilang bad ban kyrshan ïa kane ka jingthmu kaba bha. Ka Fund kaba mih na kane ka prokram kan ïarap ban pynkhlaiñ ïa ki project jong ka KJP Assembly kiba noh synniang ban kyntiew ïa ka longbriew man kaba khiah krat.
Ka dor tiket bad ka rukom thied na ka bynta ban pynsuk ïa baroh kiba kwah ban wan shim bynta bad sakhi ïa kane ka concert, la buh ïa ki dor tiket, kaba ?1,000,?1,500,?2,500
Ki paidbah ki lah ban thied ïa ki tiket online lyngba ka ROCKSKI TICKETS.COM. “Ngi kyntu ïa baroh kiba kwah ban wan sha kane ka event kin pynthikna ïalade ban thied lypa ïa ki tiket jong phi lyngba kane ka rynsan online. Na ka bynta ki donors kiba donate T 5000/- sha neng, yn ai lang ruh bad ka certificate signed ban soi da ki artist. Lyngba kane ka lad, ngi ïawer, ngi khot sngewbha, ngi kyrpad bad kyntu ïa baroh ki nongshong shnong jong ka jylla Meghalaya bad ïa kiba na shabar jong ka jylla ruh ban wan sakhi bad ïashim bynta ha kane ka Pre-Christmas Gospel Concert,” ong ki nongïalam.
“Ka jingwan shim bynta ka jong phi sha kane ka Gospel concert ka long ruh ban ai ka jingkyrshan ïa ki project jong ka KJP Assembly kiba ai jingmyntoi ïa ka imlang sahlang. Ngi kyrpad ruh ïa ki Balang, ki pastor, ki nongïalam Balang ban kyntu ïa ki khun ka Balang, ki samla, ki longkmie, ki longkpa ban ïashim bynta ha kane ka prokram. Ngi kyrmen ba kane ka concert kan long kaba jop da ka jingkyrshan jong phi bad phin nym babe haba phi wan sha kane ka gospel concert phin mad ïa ki jingkyrkhu ha ka jingim,” ong u Rev. Diengngan.