Da ka khusnam Woh Tep Kyndait Acadamic Award pynkup burom ka KSU ïa ki samla pule
Khliehriat, K’ lyngkot, 19: Ka Khasi Students Union (KSU) Wapung Unit ha ka sngi Thohdieng jong ka taiew baladep ka la pynkup burom ïa ki samla pule kiba la pas bha ha u snem 2024 lyngba ka 5th Woh Tep Kyndait Acadamic Award kum ka jingkynmaw burom ïa ka lyngkhuh sngi ïap u khlwait ka ri lum Jaiñtia, u Woh Tep Kyndait.
U Education Secretary jong ka KSU-CEC, u samla Pynkmenlang Sanmiet u la long kum u kongsan bad u Finance Secretary jong ka KSU East Jaiñtia hills District Bah Shaniahskhem Dkhar u la long kum u Symbud Kongsan.
Ka seng ka la pynkup burom ïa ki samla kiba pas bha ha ka Class-X, Class-XII, Degree bad kiba pas bha ruh ha kiwei kiwei ki jait jingpule kum ka jingai mynsiem bad ka jingpynshlur ïa ki samla pule ka thaiñ ba kin trei shitom bad ban nang leh bha ha ka pule puthi.
Ki khynnah pule ba la ïoh pdiang ïa ka khusnam ki kynthup ïa ki samla ple na ka shnong Wapung Shnong, Wapung Skur, Mookhep, Tuber Kmai Shnong, Tuber Shohshrieh bad Shohshrieh.
Ha kane kajuh ka sngi ka KSU ka la pynkup burom ruh ïa ki ar ngut ki nonghikai kiba la ïoh ïa ka kyrdan PhD, kata u Dr. Heipor Uni Bang bad u Dr.Tanbok Dkhar.
U samla Pynkmenlang Sanmiet haba kren ha kane ka sngi u la kitbok kitrwiang ïa baroh ki samla pule kiba la ïoh pdiang ïa ka khusnam “Woh Tep Kyndait Acadamic Award: ha une u snem bad kum ka jingai mynsiem bad ka jingpynshlur ïa ki samla pule u la ong, “ha ka jingim, ngi don la ki jong ki jingeh, hynrei kaba kongsan ka long ka jingkut jingmut bad ka jing ïaineh. Ki ar tylli kiba ngim lah ban thied ha ka jingim ka dei ka jingnang jingstad bad ka jingkoit jingkhiah bad lada duh noh ïa kine ka jaitbynriew kan ring swai.”
U Bah Shaniahskhem Dkhar u la ai ïa ki kyntien kyntu kynpham ïa ki samla pule ba kin nang ïai minot ha ki jingpule bad u la ong ba ka KSU Wapung Unit kan nang ïai bteng ban sam ïa kane khusnam ha ki snem ki ban wan kum ka dak ka jingkynmaw burom ïa ka lyngkhuh sngi ïap jong u khawait ka ri ka rilum Jaiñtia u Woh Tep Kyndait.