Shillong, Kyllalyngkot 17 : Ïa ka Centre for Innovations from Public Systems (CIPS), Hyderabad la seng ha u snem 2010 da ka thong ban kyrshan bad kyntiew ïa kito kiba shem thymmai ïa ki sien treikam bapher bapher khamtam ha ka rukom treikam ha kylleng ki jylla jong ka Indïa kaba long katkum ka jingbthah jong ka XIII Finance Commission.
Ka CIPS ka don ha Administrative Staff College of Indïa (ACCI), Hyderabad. Ka ASCI Hyderabad kaba dei ka kynhun synrop jong ka CIPS ha ka jingtreikam lang, ka la sdang naduh u snem 1956 da ka jingiohi jngai jong ka sorkar bad ki kompeni. Ka ASCI ka la paw ruh ha ka jinglah ban pynwandur ïa ka pule puthi ha Indïa bad ruh ban pynkhlaiñ ïa ki kompeni, ki administrator, ki nongtreikam lajong bad ruh ki riewshemphang da ka jingtbit lyngba ka rukom hikai kaba janai la ka long ha ki jaitkam ba dei bad ki ishu ba ïadei bad ka sorkar, ki kompeni bad ruh ki kynhun trei mon sngewbha.
Na ka lïang ka XIII Finance Commission ruh ka phaikhmat sha ka CIPS kum ka kynhun kaba lah ban kyntiew shakhmat ïa kane ka isenjam. Kumta ha kine ki snem, ka CIPS da ka jingkyrshan lang ka ASCI ka la lah ban sdang bun ki kam katkum ka juk thymmai la ka long ha ka koit ka khïah, ka pule puthi bad ruh ha ka lïang ka synshar khaddar ha kylleng ki bynta jong ka ri Indïa.
Kumta, da ka thong ban kyntiew ïa kane ka rukom treikam ba thymmai ha ki Union Territories (UTs), ha ki jylla ka thain shatei lammihngi jong ka ri bad ruh kylleng ki bynta ka Ri, ka CIPS ka la thaw ruh ïa ka CIPS Innovation Awards, ha kaba ki don ki riewshemphang kiba shem thymmai ïa ka buit treikam ha kine ki jylla kin ioh ïa ka jingithuh kaba kyrpang. Kane ka Innovation Awards ka don ruh ïa ka thong ban ithuh ïa ka jingtreikam ha ki rynsan paidbah ha ki saw bynta, kata ha ka pule puthi, ka marïang, nangta ha ki kam pynroi nongkyndong bad ruh ha ka koit ka khïah bad ki lad ai jingtip ne ka Information Technology.
Kumta, halor kane, ka CIPS ka la khot ka wer na ka bynta ban thep kyrteng na bynta katei ka CIPS INNOVATION AWARDS 2023 na kitei ki jylla bad ki UT. Halor kine, ka CIPS ka la ioh pdaing 117 tylli ki nongthep kyrteng ha kaba 106 ngut kitei ki riewshemphang kiba don ïa katei ka jingtbit ki la shah khot ban pyni markhmat ïa kata ka jinglah jong ki. Ka long ruh kaba sngewkmen ba ïa kane ka khusnam la mang ban ai ha ki 18 tylli ki jylla bad ki UT ha kylleng ki bynta jogn ka Ri bad ngi la ioh pdïang ruh ïa ka jingthep kyrteng na baroh kitei ki jylla bad UT. Kaba bun eh ka jylla kaba thep kyrteng dei na Assam kaba la bud pat sa na Tripura bad Himachal Pradesh. Kaba bun eh ka phang kaba ki thep kyrteng kadei halor ka marïang bad ki kam pynroi nongkyndong bud pat sa ka phang kaba ïadei bad ka pule puthi.
Hadien ba la dep ban pyni markhmat ïa ka jingtbit jong ki 106 ngut ki riewshemphang, haduh 31 tylli ki kyrteng la jied ban ka bynta ban wad bnïah shuh shuh bad kumtga 18 tylli ki khusnam la ai ha ka 19tarik Kyllalyngkot.
Ha ka phang kaba ïadei bad ka koit ka khïah bad ka pule puthi, ki la don saw ngut ki nongioh khusnam katba ha ka phang Information Technology bad ha ka Environment & Rural Development, kin sa don san ngut ki nongioh khusnam.
Na ka lïang ka CIPS ha ryngkat ka jingïatreilang bad ka Government Innovation Lab, Meghalaya ka la pynlong ruh ïa ka CIPS Awards Ceremony 2023 ha ka 19tarik Kyllalyngkot ha Vivanta Shillong. Ha ka sngi ba don ka jingsam khusnam kan sa don ruh ka panel discussion halor ka (i) koit ka khïah, (ii) ka jingpyntreikam da ki kor ki bor ka juk mynta na bynta ka e-governance, (iii) ka pule puthi bad (iv) ka Environment & Rural Development, ha kaba kitei ki riewshemphang bad ki stad wadbnïah kin ïa tai ïa ki buit ban pyntreikam ïa kitei ki sienjam, ki jingeh bad kiwei kiwei.
Na ka lïang u Myntri Rangbah ka jylla, Conrad K Sangma un sa donlang kum u Kongsan bad ban sam ruh ïa ki khusnam bad pyllait paidbah ïa ka jingthoh kaba kdew ïa ka jingktah bad ka jingpynmih bujli da kitei ki 18 tylli ki jingshemba thymmai. U Myntri Rangbah un sa kren ruh ha katei ka jingïalam bad hadien kane un sa sam pat ïa ki khusnam sha ki nongjop.
U Sampath Kumar, ÏAS, Development Commissioner & Principal Secretary (Health and Community & Rural Development Departments), ka sorkar Meghalaya u la mynjur ban snohkti lang bad ka CIPS bad ruh ban don bynta lang ha katei ka rynsan wad jingtip hapdeng ki kynhun jong kine ki riewshemphang kiba wan na kylleng ki jylla, kiba ka jylla Meghalaya ka don ka jingïasyriem ha ka jingling jingman ka jaka. Ka long ruh kaba donkam ban tip bad iohsngew lang na kiwei pat kumno ngi lah ban ïaid shakhmat bad thom ïa kine ki jingeh da kaba wanrah pat da kiwei ki sienjam ba thymmai na ka bynta ban pynjanai shuh shuh ïa ka rukom treikam.
Ka jingpyntreikam da ki buit ba thymmai ha ka synshar khaddar ruh kadei kawei na ki mawnongrim jonjg ka Meghalaya Government Innovation Lab.
Ha kane ka sngi kin don haduh 80 ngut ei ei ki ophisar na kylleng ki shnat treikam jong ka ri Indïa kiban wan ban shim bynta lang ha katei ka sngi sam khusnam ban pyni ïa ka jingshem ba thymmai jong ki bad ruh ban pynshai shuh shuh halor ki rukom treikam kiba kham paka kiban shimti da ki jylla na ka bynta ban ai shuh shuh ka jingshakri kaba janai sha ki nongshong shnong.
Ha ka kyrwoh, i Dr. Valli Manickam, Director, CIPS i la kyntu ïa ki ophisar sorkar kiba shim bynta ha katei ka rynsan sam khusnam ba kin wan ban jied bad bishar ïa ki buit treikam kiba thymmai kaban ïahap katkum ka jinglong jingman jong ki jylla jong ki ne ki Union Territories. Ka CIPS ka pynkupburom ruh ïa kito ki riewshemphang kiba wanrah ïa ki buit treikam kiba lah ban mih bujli thymmai da kaba kyrshan ïa ki jingdonkam jong ki ha kaban pyntreikam pura ïa ka.
Na ka lïang u Dr. Nirmalya Bagchi, Director General, ASCI bad Chairman, Steering Committee, CIPS, u la ai ka jingkhot sngewbha ïa baroh ki jylla bad ki UT kiba kwah ïa ka jingkyrshan haba ïade bad ka jingai jinghikai, jingwad bnïah, ki polisi bad kiwei kiwei kiba ki donkam. U la kyntu ruh ïa ki jylla bad UT ba kin pyndonkam hok ïa ki kabu ksïar ba ki ioh ha katei ka sngi kaba yn donlang naduh ki heh jong ka CIPS – ASCI bad kiwei kiwei ki heh sorkar na kylleng ki jylla ban ïatai halor katei ka mat.
