Leit ïa kynduh bad aiti u Ma Sniawbha ïa ka Souvenir sha ka President Murmu ha Raj Bhavan

Shillong, Kyllalyngkot 17 : U Symbud Myntri Rangbah ka jylla uba dei peit ïa ka tnad pynroi sor u Ma Sniawbhalang Dhar u la leit ïa kynduh ïa ka President jongka Ri ka Droupadi Murmu mynta ka Sngi Balang ha ka por mynstep ha Raj Bhavan Shillong. Ha kane ka jingleit ïa kynduh u la aiti ruh ha ka President ïa ka Souvenir kum ka dak ban sah kynmaw halor kane ka jingwan ïuhkjat ba nyngkong eh jongka ha kane ka jylla Meghalaya.
Ha kane ka jingïakynduh u Ma Sniawbha u la ïoh lad ban ïakren bad ka President halor kiba bun ki mat khamtam eh halor ki mat ban pynkhlaiñ shuh shuh ïa ka kyrdan jong ki kynthei ha baroh ki liang naduh ka khaïi ka pateng, kam saiñ pyrthei haduh ki kam ha ka imlang ka sahlang. U la batai ruh sha ka President ïa ka jinglong kyrpang jongki jaidbynriew riewlum jongka jylla Meghalaya namar ki ñiewkor bha ïa ki kynthei bad ki ai jait ruh sha ka Kynthei. U la ïakren ruh halor kiba bun ki skhim ba ka sorkar pdeng ruh ka la leh na ka bynta ban kyntiew ïa ka kyrdan jong ki kynthei.
Na ka liang ka President ka pynpaw ka jingsngewkmen halor kane ka jingwan jongka sha kane ka jylla Meghalaya da kaba ka la ai ka jingïaroh ïa ka sorkar bad ïa baroh ki prokram ba la pynkhreh ba kan ïadon ryngkat. Ka la sngewhun ruh ban tip shaphang ka jinglong kyrpang ki kynthei ha kane ka jylla kaba long ka nuksa wat ïa kiwei ki jylla ruh.