Ka jingthmu jong ka sorkar jylla ban shah ne ban wanrah ïa kata ka ktem khalai ba la tip kum ka ‘Casino’ ha Khanapara, Ri Bhoi District ka la wanrah ïa ka jingkhih win ha ka jylla baroh kawei. Wat la officially ym lah ban ong ba ka Jylla Meghalaya dei ka jylla Khristan ne ka Christian State namar ba ka ri India hi baroh kawei ka dei ka ri ba laitluid ki jait niam ne Secular Country, hynrei la ju tip ieit ïa kane ka jylla kum ka Christian State. Kumta ka jingthmu jong ka sorkar ban wanrah ïa katei ka ktem khalai ha katei ka jaka jong ka jylla ka ktah haduh katta katta ïa ka jingsngew jong kiba bun ki khristan khamtam ïa ki nongialam jong ki balang bapher bapher. Kat kum ka jingïatwad jingmut na kiba bun ki nongshnong shnong ka jylla hi ki kubur bad ka jingwanrah ïa ka ktem khalai ka long ka jingtim ia ki longïing kiban ngat ha ka, kumba u khasi wat ïa ka saitkhnam ruh haba la pynlong khalai ïa ka u khot da ka Tim.
Yn baroh u dap u thap uba tip bad shemphang haduh katno kata ka ktem Khalai Casino kan ktah ïa ka imlang sahlang, hynrei tang kawei ka jingshisha kaba ki paidbah ki donkam ban tip ka long ba ka nongbah Las Vegas ha America ka dei kawei na ki ktem Khalai Casino kaba heh tam ha ka pyrthei lah ban ong bad la jutip ïa kane ka Nongbah kum ka Sin City ne kata ka nongbah jong ka Pop. Ha ryngkat katei ka Ktem Khalai Casino sa kiei dei ki jingsniew ki ban dang rieh kat haduh ban jer ïa katei ka nongbah da ka nongbah jong ka Pop. Dei na kata ka daw ba ki balang khristan ki sngewkha haduh katta katta ban tip ba kum katei ka ktem kan ïoh ban phrung khlieh ha kane ka jylla baieit jong ki briew kiba dang lait na kiba bun ki jingsniew kiba shyrkhei ban ïa nujor bad kiwei pat ki nongbah wat tang hapoh ka ri India hi ruh.
Ki don ki briew kiba ong kan leh aiu da wan kata ka Casino ruh namar hangne ha ri Khasi ka khalai ka la long lypa kaba jubor khmatam lei ha kaba phai sha ka Tim ! Ñiuma wat ka Tim hi ruh ka la pynjot ïa kiba bun ki longïing tang kiba mad ki tip ia kata, hynrei haba bishar ïa kane ka tim ka dang long tang i ei i ei i barit ban ïanujor bad kat kata ka Casino kaba yn pynkhalai khlem sangeh bad katno kan long ka jingbrai kaba shyrkhei ia kito kiba ïakyrsum ha kane ka jyrsieh. Ka tim la kumno kumno ruh tang shi sien shi sngi kata ha ki 2 tylli ki round bad katta ruh ka ïaid ryngkat ryngkat bad ka rangbiria u Khasi kaba long kawei na ki rukom im jong ki riew rim.
Hooid naka bynta jong ka sorkar kam don kaei kaei kaba sniew la da la ithuh ïa ka da ki bor ka aiñ , namar ba ka jingthmu jong ka sorkar hi ka long beit kumno ban kyntiew ïa ka jingïoh lum khajna lyngba jong katei ka ktem khalai. Hynrei ym lah ban len ïa kiei kiba rieh sha lyndet lada kan dei ban sdang ïa katei ka kam naduh nyngkong eh ka jingmyntoi shimet kan trei borbah bad kito ki briew kiba ïadonbynta ha kaban kyrshan ba ka kam ka dei ban urlong, naduh ki riew shimet haduh ki sengbhalang, ki bor shnong bor thaw bad kiwei kiwei. Ka jingïoh jingmyntoi kan pynlong ïa kiba bun ban iatreilang ban pynpoi ïa ka kam sha ka jingthmu.
Ka la don ka jingong ba ka sorkar ka kyrduh pisa dei na kata ka daw ka donkam ban thaw ïa ki lad ki lynti kumno ban wanrah ïa ka khajna kaba heh. Ki don ruh ki jingpynshalai ba hana yn lah ban peit ïa ka jingeh jong ki nonghikai lyngba ka khajna ban ïoh lum nangtei. Hooid kan lah ban long kumta hynrei kin don shibun kiwei pat ki jingsniew ki ban kha roi hadien ba katei ka ktem kan ïoh ban pyiar bad suhthied bad kan poi ka por ba kum ka jaidbynriew kaba dang tip ïa ka akor ka burom kin ym lah leh ei ei shuh wat lada kin babe ruh.
Ka long kaba i don jingkyrmen ban ïohi ïa ka jingmih jong ka Ri Bhoi Dorbar bad ki sengbhalang ban pyrshah ïa katei ka rai jong ka sorkar ban ïaid shaphrang ban tei ïa katei ka ktem pynkhalai Casino ha katei ka bynta jong ka Ri Bhoi District. Kyrmen ba yn lah ban khang syndon ïa katei ka jingthmu ban lam sha ka jingpynjot ïa kiba bun.
