Da ka jingsynran ki Assam Pulit wan pom pathar ki Karbi ïa ka khlaw shnong Khanduli

Jowai Jylliew 27. Ha ka khubor kaba la phah da u ma Yoshida Nongspung Rangbah shnong bad ki nongkit kam shnong ka shnong Khanduli la ong ba ha ka jingsynran jong ki Assam Pulit shikynhun ki Karbi lang bad ki dkhot jong ka Karbi Student Association West Karbi-Anglong ki la wan pom pathar bad pynjulor ïa ki Dieng ki Siej kiba don hapoh u pud u sam jong ka khlaw shnong Khanduli ha kane ka 22 tarik Jylliew 2023, khlem ka jingtip jong ka shnong.
La ong ba ki Dieng ki Siej kiba don ha kane ka Khlaw shnong ki dei ki Dieng ki Siej kiba la ri la sumar da ka shnong, ka dei ka khlaw shnong ha kaba ki nongshong shnong jong ka shnong ki pyndonkam ïa ki dieng ki Siej na kane ka khlaw ha kaba shna ïing shna sem, ka diengïap na ka bynta ka shet ka tiew bad kiwei de ki jingpyndonkam. La ong ruh ba ka jinglongtrai jong ka shnong Khanduli ïa kane ka khlaw la pynshisha da ka Land Holding (ka hok longtrai) kaba ki la ïoh na ka Ophis jong ka Jaiñtia Hills Autonomous District Council Jowai.
Halor kane ka jingleh dusmon, pom pathar bad pynjulor naphang ïa ki Dieng ki Siej kiba la thung la ri la sumar bad pynheh pynsan da ka shnong kiba don ha kane ka khlaw shnong da ki Karbi bad ki Assam Pulit la pyntip ruh sha u Deputy Commissioner jong ka West Jaiñtia Hills bad kum juh sha ki bor District jong ka West Jaiñtia Hills ban leh eiei ïa kine ki nongwan thombor ïa ki khlaw ki btab kiba don hapoh u pud u sam jong ka shnong khnang ban lait na ka jinghuri hura, ka jingïakynat bad ki jingjia ba sngewsih hapdeng ki nongshong shnong bad ki nongwan thombor ïa ki khlaw ki btab jong ka shnong kiba don hapoh u pud u sam jong ka shnong.
La ong ruh ki Karbi ki shlur ki nud ban wan pom pathar bad pynjulor ïa ki khlaw ki btab kiba don hapoh u pud u sam jong ka shnong naba la synran ïa ki da ki Pulit Assam, hynrei hapdeng kine ki jingshah pynjulor ki khlaw ki btab jong ka shnong, na ka liang ki nongshong shnong jong ka Khanduli ki dang long kiba ïaishah naba ki khmih lynti ba ïa ki jingeh kiba ki shah lehbeiñ da ki Karbi bad ki Assam Pulit yn ïada da ki bor District jong ka West Jaiñtia Hills bad ka sorkar Meghalaya pynkut ka kyrwoh.