Da ka jingpyni paid, pynshongshit ki kyrtong ka UDP bad NPP ha Sohiong constituency

Shillong, Rymphang 10 : Ka Sohiong constituency ha kane ka sngi Balang ka sakhi ïa ka jingpyni paid na ki arngut ki kyrtong, kata na u kyrtong ka UDP, Bah HDR Lyngdoh bad ruh na u kyrtong ka NPP Bah Samlin Malngiang ba dei ruh u MLA ba dang shu resaiñ shen na ka jinglong nongmihkhmat.
Ha ka jingïalang jong ka UDP ha Sohiong da ki hajar ngut ki paidbah ki la wan ban sngap ïa ka jingpynshai jong u kyrtong ka party, Bah HDR Lyngdoh ba dei ruh u MLA barim bad Myntri Kampohiing barim ka sorkar jylla.
Haba kren ha ka jingïalang, u Bah HDR u la ong ba ka jingwan tuid jong kitei ki paidbah ba bun sha ka jingïalang sa shisien pat ka la ai mynsiem ïa u ha kane ka jingpynkhreh na ka bynta ka elekshon MLA kaban sa long shen.
“Kane ka dei ka jingieid jong phi kaba phi la ai ïa nga ki 20 snem mynshwa ka la wan phai biang,” u la ong haba kren ha katei ka jingïalang.
Shuh shuh u la ong ruh ba ka jingwan jong ki paidbah sha ka jingïalang ha katei ka sngi ka la pynshngaiñ biang ïa u sa shisien pat ba kin ïoh ban khur ïa ka jingjop ynda la pynbna ïa ka result ha ka 02tarik u Lber mynta u snem.
Ha kane kajuh ka sngi ha ka jingïalang jong u kyrtong ka NPP kaba long ha Weilyngkut, da ki hajar ki paidbah ki la wan ban sngap ïa ka jingïalap elekshon jong u kyrtong. Haba pynshai halor ka jingleit pynïasoh sha ka NPP, u Bah Samlin u la ong ba u la shim ïa katei ka rai ryngkat bad u paidbah bad mynta ruh kin jop donburom ïa kane ka elekshon ryngkat bad u paidbah.
“Hapdeng ka jingshah kynthoh, ka jingkynnoh ïa u Bah Samlin hynrei ngin ym kyllon ïano ïano hynrei ngin ïai ïalam nangne shakhmat,” u la ong.
U Bah Samlin ha kane ka sngi u la kam ruh ba kum u nongmihkhmat ha kine ki san snem u la wanrah bun ki kam pynroi khamtam haba iadei bad ki lynti syngkien bad ka umbam umdih.