Da ka jingkieng ba thymmai yn tei ka sorkar ha ka jaka ba jngai 3 Km sharum jongka Dam Umiam

Shillong, Kyllalyngkot 28 :Ka sorkar jylla ka la pynkhreh ban tei ïa ka jingkieng ba thymmai ka ban jngai kumba 3 Km sharum ka Dam Umiam.
Halor kane ka sorkar jylla ka la bthah ïa ka National Highways Infrastructure Development Corporation Ltd (NHIDCL) ban leit jurip bad sorbe ïa ka jaka bad ban ai ïa ka kaiphod sha ka sorkar.
“ Ngi dang don jingthmu ban tei ïa ka jingkieng ba thymmai kaba jngai kumba 3 Km ei ei sharum ka Dam Umiam khnang ba ki kali kin ïaid noh nangnta” ïathuh u Symbud Myntri Rangbah uba peit ïa ka tnad PWD (Roads) u bah Prestone Tynsong.
“ Ka NHIDCL ka dang khmih ne peit bniah ïa ka jaka bad shen kin sa ai ïa ka kaiphod sha ka sorkar bad hadien kane ka sorkar kan sa shim ïa ka rai kaba khatduh” ong u bah Prestone.
U la ïathuh ruh ba kat kum ka kaiphod kaba mynshwa la pyni ba lah ban shna ïa ka jingkieng shaneng ka jingkieng Dam hynrei hadien la lap ba kam long shngaiñ ïa kane ka Dam ba mynta lada tei shaneng na kata ka daw la rai ban hiar noh sha rum kata ruh ha ka jingjngai ba 3 Km.
“ Ngi la thoh ruh sha ka Geological Survey of India (GSI) bad ki ruh ki la pynlong ka jingpeit bniah ïa ka jaka shaneng ka jingkieng dam bad ki la pynpaw ha ka kaiphod ba lada shna tang na ka jingkyiuh ha ka por ba shna ruh ka lah ban ktah jur ïa kane ka Dam ba mynta” ïathuh biang u Symbud Myntri Rangbah.
U la ïathuh shuh shuh ba ha ka kaiphod ka GSI ka la pynpaw ba lah ban tei ïa ka jingkieng ba thymmai sha rum ka Dam kham shajngai kane ka jingkieng Dam ba mynta. Nalor kata lada shna kane ka surok ba thymmai kan ym ïa tyngkhuh shuh bad ka surok rim hynrei kan ïaid da kawei ka surok ba thymmai. Ha katei ka por lehse yn bishar bad shah ïaid tang ki kali rit ne ki bym kit khiah na kane ka jingkieng barim bad kiba kit jingkit kin ïaid beit na katei ka jingkieng ba thymmai.
Kumba long mynta ka jingpynbha ïa ka jingkieng Dam ka dang ïaid shaid shaid lyngba ka skhim Dam Rehabilitation and Improvement Project (DRIP).
U Myntri ka tnad bording u AT Mondal u la ïathuh ba ïa kane ka jingpynbha yn pyrshang ban pyndep shwa ban poi ka Lyiur. U la ïathuh kan sa poi ka por ban hap khang dam ïaka jingkieng kata ha ka por ba law lut ïa ka jingkieng ban thep ïa ki Bearing ba thymmai. Ha kum katei ka sngi yn ym shah ïa kino kino ruh ki kali ban ïaid bad yn sa batai na kino ki surok ba kin hap ban ïaid ha kitei ki sngi ba khang ïa ka jingkieng Dam.