Nongpoh, K’Lyngkot : Hadien ka jingïaid shaphrang jong ka lympung ïalehkai phutbol jong ka KSU Umsning Circle bala tip kum ka Maitshaphrang U-14 Knock-Out Football Tournament, katei ka lympung kala poi noh sha kaba kut hadien ka jingïakhun phainal hapdeng ka Eastern Ri-Bhoi pyrshah ïaka Kynjoin Umran haka sngi Saitjaiñ ha madan ïalehkai ka Umsning Town Dorbar.
Kum ban shu pynpaw ba ka jingthmu jong ka KSU ban pynlong ïa katei ka lympung ka long ban lum ban lang ïaki heprit kiba don ka sap ïalehkai phutbol, ba kin pynmlien ïalade ban kilan met bad ïalehkai ban lait naki jingmlien ba sniew khamtam u drok bad kiwei kiwei ki jingdih buaid.
Ïa katei ka lympung la wan ban pynhap pyrda noh haka sngi Saitjaiñ da u Samla Lambokstarwell Marngar President ba rangbah ka KSU sengkmie kum u kongsan haka jingdonlang u Samla Ferdinald Kharkamni President ka KSU NKHD Unit, samla James Mawphñiang General Secretary ka KSU NKHD Unit, U Samla Joseph Lambok Rymbai Vice President Bah Rocky Kylla Chairman ka Umsning Town Dorbar, Bah Rocky Marweiñ Rangbah Shnong Umsning Proper B, Kong M Kharnaior President Seng Kynthei bad kiwei kiwei ki riew rangbah.
La wan ruh ban pynshit pynshngaiñ ha katei ka sngi da ka jingdonlang u Samla Aiborlang Khongjee u ba dei uwei naki khlur ïalehkai phutbol ba bna nam ka jylla uba la ioh ïaka lad ban leit ïashimbynta sha ki lympung ïalehkai ba heh haka ri India kum ka ISL, I-League bad uba la mih khmat ruh ïa ka Ri India ha kane ka kynti bad u ba dei ruh mynta u Head Coach jong ka Rangdajied United Football Club.
Haba phai sha ka jingïalehkai ha katei ka sngi ki heprit ki la ïa trei borbah ban ioh thep kol bad la lah ruh ban iohi ïaka jingtbit jong ki heprit ban ïalehkai watla ka madan kam pat da biang bala wan ruh ban sakhi da ki spah ngut ki paidbah nongkyrshan bad haka kylla step ka jingïakhun ym shym la don ba ioh pynkhih ïaka jar.
Haba phai sha ka kylla miet ka jingïakhun kala nang kham shongshit shuh shuh bad hapdeng ka jingïakhun kaba jur ka Eastern Ri-Bhoi kala ioh ban thep haduh 2 kol hynrei shuwa ban kut katei ka jingïakhun ka Kynjoin Umran kala ioh ban pynphai noh shi kol kaba la biang pura ïaka Eastrn Ri-Bhoi ban rah ïaka nam lahduh jong katei ka lympung da 2-1 kol.
Kum ka jingpynshlur ïaki khun samla ha katei ka sngi naka liang ka KSU kala ioh ban sam ïaki khusnam ha kaba ka Eastern Ri-Bhoi kala ioh ban rah ïaka song pisa kaba 40 hajar lem bad ka trophy katba ka Kynjoin Umran kala ioh ban rah ïaka song pisa kaba 20 hajar lem bad ka trophy.
La sam ruh ïaki khusnam kiba kyrpang sha ki heprit kiba la lah ban ïalehkai bha kiba kynthup ïa u heprit Nangtei Mukhim uba la iohrah ïaka nam Top Scorer, u heprit Ledestar Tangsang kum u Heprit ba tbit tam jong ka tournament, u heprit Emeral Sohiong kum u rangïalehkai ba kynsai jong ka sngi, u heprit Mewanpynskmen Kshiar kum u nongïalehkai ba khynnah duh jong ka tournament, bad ïaka kynhun kaba biang tam nadong shadong la iohrah da ka kynhun ïalehkai football ka Syad Lyngdoh FC.
