Da ka jingïalehkai kaba tyngeh ha ka kylla miet wanphai ka Mawlai ban pynliem da 5 kol ïa ka Laitkor

Shillong, Naitung 30: Ka Mawlai ka la pynjemkhnap ïa ka Laitkor da ka jingïalehkai kaba tyngeh ha ka kylla miet ban jop suk da 5-0 ïa ka jingïakhun ha ka Shillong Premier League 2026 hynne ka sngi Palei ha madan First Ground-SSA Stadium.
Ha ka jingjop kaba bun kol tam jong kane ka samoi haduh mynta, ka Mawlai kaba la rah nam lahduh arsien ka la ïoh pynkhihjar lyngba u Samlang Rympei (49’), u Fairming Suting (52’), u Wadshwa Latoo (55’), u Basuklang Bina (71’) bad u Bajiedlang Rangslang (86’).
Ka jingïalehkai kaba khlem kol ha ka kylla step ka la pynlong ïa baroh ha madan ban pyrkhat ba kane kan dei kawei pat ka jingïalehkai jong ka SPL 2026 ka ban kut ha ka jingïakhaid lane kawei ka liang kan shu jop da ka said. Shuwa kane ki la don lai tylli ki jingïakhun kiba la kut da ka jingjop kaba tang 1-0 bad ka jingïakhaid da 1-1.
Hynrei ki rangïalehkai ka Mawlai ki la mih madan kham pher ha ka kylla miet hadien ka jingïakren bad u coach ba la paw jong ka kynhun, u bah Hering Shangpliang. Ki la lah ban pynpra ïa ka kut ba skhem jong ka Laitkor katba ki mon da ka rukom pashat bol kaba thikna bad kaba janai.
Kiei kiei baroh ki la sdang ban treikam na ka bynta ka Mawlai ha kaba ka la ïoh ban lamkhmat ïa ka jingïakhun tang 4 minit haba la sdang ïa ka kylla miet lyngba u Samlang, nangta bud sa ar tylli ki kol hapoh lai minit na u Fairming (52’) bad na u Wadshwa (55’) kaba la nang pynskhem ïa ka jingkyrmen ban khur pura ïa ki lai point.
Naduh kane ka por ka jingïakhun ka la sdang ban jaijai hynrei ki kol kim shym la sangeh, namar u Basuklang bad u Bajiedlang ki la bynrap sa ar tylli ki kol ha ka minit kaba 71 bad 86 ban pynkut da ka jingjop kaba shongkhun ryngkat bad ki lai point.
Ka jingïakhun ban wan jong ka SPL kan long ha ka 04 tarik u Nailar hapdeng ka Sawmer pyrshah ïa ka Rangdajied United ha ka por 4 baje janmiet.
Ka Sawmer ka la shah rem ha ka jingïakhun ba nyngkong jong u snem 2026 da 1-0 ha ka Langsning kaba bat ïa ka nam lahduh, katba ka Rangdajied ka la ïakhaid ha ka jingïakhun ba nyngkong jong ka da 1-1 bad ka Meghalaya Police.