Da ka jingïakop mareh thong ba 5km rakhe ka ophis u EE ka PHE ïa ka Rajya Jal Utsav bad Lok Jal Utsav 2026
Mawkyrwat, Nailar 30: Kum shibynta jong ka jingrakhe ïa ka Rajya Jal Utsav bad ka Lok Jal Utsav 2026 ha South West Khasi Hills District, ka ophis jong u Executive Engineer ka Public Health Engineering (PHE) Department, Mawkyrwat Division, ha ka jingïatreilang bad ka District Sports & Youth Affairs bad hapoh ka Jal Jeevan Mission, ka la pynlong ïa ka 5-KM Run kaba don ïa ka phang, “Celebrating Water – Securing Sources”.
Ka jingïamareh ka la sdang na ka PHE Office bad ka la ïaid lyngba Ïew Mawleiñ–Jakrem, Ïew Sakwang, Ïew Pyndensakwang bad District Court, pynkut biang ha PHE Office.
Ïa ka 5-KM Run la bynta ha ki saw tylli ki kyrdan, kata Category A – Shynrang (15–35 snem) kaba don 46 ngut ki nongshim bynta, Category B – Shynrang (35 snem shaneng) kaba don 18 ngut, Category C – Kynthei (15–35 snem) kaba don 15 ngut, bad Category D – Kynthei (35 snem shaneng) kaba don 11 ngut.
Ki nongjop ha man la kawei pa kawei ka kyrdan kin ïoh ïa ka khusnam pisa kaba ?5,000 na ka bynta ka kyrdan kaba nyngkong, ?3,000 na ka bynta ka kyrdan kaba ar, bad ?2,000 na ka bynta ka kyrdan kaba lai. Nalor kata, yn sam ruh ïa san tylli ki consolation prize, kaba long ?1,000 kawei pa kawei, ha man la ki kyrdan.
Ha Category A – Shynrang (15–35 snem), u Wonderful Paliar u la ïoh ïa ka kyrdan kaba nyngkong, bud sa u Jinesfulson Hoojon uba wan ha ka kyrdan kaba ar, bad u Bankerlang Kharjahrin uba wan ha ka kyrdan kaba lai.
Ha Category B – Shynrang (35 snem shaneng), u Tlanding Wahlang u la ïoh ïa ka kyrdan kaba nyngkong, bud sa u Jomsingstar Ramsiej ha ka kyrdan kaba ar bad u Wanbokstar Wanniang ha ka kyrdan kaba lai.
Ha Category C – Kynthei (15–35 snem), ka Phidashisha Lyngdoh ka la ïoh ïa ka kyrdan kaba nyngkong, bud sa ka Larisha Thongnibah ha ka kyrdan kaba ar bad ka Elfidary Wartde ha ka kyrdan kaba lai.
Katba ha Category D – Kynthei (35 snem shaneng), ka Twina Pariong ka la ïoh ïa ka kyrdan kaba nyngkong, ka Thlingda Wanniang ka la wan ha ka kyrdan kaba ar, bad ka Rolinda Wanniang ka la ïoh ïa ka kyrdan kaba lai.
U bah E. Khongthiang, SDO (TC) ka PHE Mawkyrwat Division, u la ïashim bynta ha kane ka prokram kum u Kongsan bad u la kaweh ïa ka lama ban sdang ïa ka jingïamareh ha ka jaka ba sdang, ha ka jingïadonlang ki nongtrei jong ka PHE Mawkyrwat Division bad napoh ka ophis jong ka District Sports Office, South West Khasi Hills District.