Shillong, Naitung 18 : Ki Seng Saiñ Pyrthei bapher bapher ka Ri kiba don ha ka Liang Pyrshah, ki la thaw mynta da ka kynhun synrop Indian National Democratic Inclusive Alliance (INDIA) ban mih ïakhun pyrshah ïa ka Bharatiya Janata Party (BJP) bad ïa ki paralok kiba don ha ka National Democratic Alliance (NDA), ha ka elekshon MP-Lok Sabha 2024.
Ki Seng Saiñ Pyrthei bapher bapher ka Ri ki la jer kyrteng ïa kane ka kynhun Synrop da ka Indian National Democratic Inclusive Alliance (INDIA) bad ia kane la pynthikna ha ka sngi Ba-ar da ka RJD bad ka Shiv Sena.
Haba sam ïa ka jingtip hapoh ka Twitter jong ka JDU, la ïathuh ba ka kyrteng ba thymmai jong ka kynhun Liang Pyrshah la jer kyrteng kum ka “INDIA”.
Haba pynthikna ïa kane ka kyrteng, ka Priyanka Chaturvedi jong ka Shiv Sena ka la ong “Ka jingïakhun ha u 2024 kan long hapdeng ka kynhun INDIA pyrshah ïa ka Kynhun ka NDA..Chak De, INDIA”.
Shuwa kane, u MP ka TMC Derek O’Brien ruh ula thoh “Chak De! INDIA” hapdeng ka khubor ba ka Liang Pyrshah ka la jer ïa kane ka kynhun Synrop “INDIA” ha ka jingïalang ba long ha Bangaluru.
Ha kane ka jingialang ba arsngi, ki khlieh Nongïalam jong kumba 26 tylli ki Seng Saiñ Pyrthei ki la ïashim bynta ban pynskhem ïa kane ka kynhun synrop ba thymmai, ka ban ïakhun pyrshah ïa ka BJP ba la ïalam da u Myntri Rangbah Duh Narendra Modi, ha ka elekshon Lok Sabha, 2024.
