Nongpoh, Nohprah 30: Ki ummat jong ka jingkmen ki tuid ha ki khmat jong ka Longkmie kaba kyrshan ïa ki khun hapdeng ka jingduk, namar mynta ka sngi shuwa ban pdiang ïa u snem ba thymmai ka FKJGP Byrnihat Circle ka la aiti noh ïa ka Ïing kaba ka la pynshna kyrpang sha kawei ka Longïing baduk ha ka shnong 15mer, Nongthymmai ha ka thaiñ Byrnihat ha Ri Bhoi District.
Kane ka Longkmie kaba la ioh pdiang ïa kane ka ïing ba la pynshna ei da ka FKJGP Byrnihat Circle ka dei ka Longkmie ba la tip kyrteng kum ka Kong Krepmon Khongmuit kaba don saw ngut ki khun bad kaba hap bsa marwei ïa ki khun kaba dei hadien ba u Kpa ka ïing u la khlad noh la kumba 6 snem mynta.
Haba aiti ïa kane ka ïing la wan ban plie bad aiti da u Vice president ka FKJGP sengkmie, u Bah Kitboklang Nongphlang ha ka jingdon ryngkat u President ka FKJGP North Khasi Hills District, u Bah Lui Star Lyngdoh, u Senior vice president, u Bah Lumlang Mawnai, u General secretary, u Bah Shanlang Diengdoh, u Rangbah Shnong ka 15mer, u Bah Elin Suting, u pastor Kordor Swer bad kynthup ki longkmie, ki seng samla badnki dkhot nongïalam ka FKJGP na sengkmie bad na Ri Bhoi District bad Byrnihat Circle. Ïa ka jingïalang la pynïaid da u General Secretary ka Byrnihat Circle, u Bah Noah Khongstid.
Lyngba jong kane ka sngi ka jingkmen kam dei tang ïa kane ka longïing kaba la ioh pdiang sngewbha da ka ïing kum ka jingai sngewbha snem thymmai, hynrei naduh ki Longkmie, ki Samla bad ki nongïalam Shnong ruh ki ïa kmen lang haba la aiti ïa kane ka ïing sha ka Longkmie Krepmon Khongmuit.
Haba kren ha kane ka sngi kum u kongsan, u Bah Kitboklang Nongphlang kum u Vice President ka seng kmie u la ai khublei kyrpang ïa ka FKJGP Byrnihat Circle kaba la shim ïa kane la kam kaba bha tam ban pynshna ïa kane ka ïing da kaba ïa synñiang para dkhot bad kane ka dei ka kam kaba kum ki nongïalam ki don ka jingkitkhlieh ban ïa tynrong lem ïa ki paradoh ki para snam kiba duk ba kyrduh.
U la ong ruh ba kane ka dei ka lyngkhuh sngi ïap ba 160 jong u Woh Kiang Nongbah bad kaei ka kam kaba kitei ki nongïalam kila leh ka long ruh kum ka jingkynmaw burom ïa une u khla wait, namar ka jinglong nongïalam kam dei ka pangsngiat hynrei ka dei ka jingkitkhlieh bad kane ka sienjam ban pynshna da ka ïing sha katei ka longkmie kaba duk ba rangli ka long kum ka nongmuna pateng la pateng ba kum ka seng kan dang lah ban shakri khambha naka bynta ka ri bad ki paradoh parasnam.
