Da ka ‘digital literacy’, pynkup bor ka Dalmia Bharat Foundation ïa ki shnong nongkyndong ha Meghalaya

Khliehriiat, Rymphang 17 : Ka Dalmia Bharat Foundation (DBF), kaba dei ka Corporate Social Responsibility (CSR) jong ka Dalmia Cement (Bharat) Ltd (DCBL), ka karkhana pynmih dewbilat ba paw khmat ha ka Ri India, ka la shim ïa ka sien jam ban kyntiew ïa ki shnong nongkyndong kiba kham sah shadien lyngba ki jingai jinghikai da ki kor ki bor jingstad ka juk mynta lane ka digital bad financial literacy ha Meghalaya bad kane k dei kawei na ki project jong ka company ban kyntiew shuh shuh ïa ka imlang ka sahlang kaba katkum ka juk mynta.
Kine ki projek ki dei ki prokram kiba ai jinghikai bapher bapher na ka bynta ki shynrang, kynthei bad ki samla ban kyntiew ïa ki sap lyngba ki kor ki bor jingstad bad kyntiew ruh ïa ka ïoh ka kot ha ka imlang ka sahlang, kawei na ki digital literacy ka dei ka prokram “World on Wheels” (WoW), kaba don ïa ki bus ryngkat ki digital literacy lab ban ai ka e-education bad ki digital resource ha ki jaka nongkyndong. Nalor kine, ka Common Service Lab (CSL) ha Lumshnong ka plie lad bad pynleit jingmut ha ki jinghikai ba kyrpang ha ki bynta digital bad financial literacy.
Katkum u kyrwoh la ong ba kine ki sienjam ki la wanrah shibun ki jingkylla, ryngkat ka jingkyntiew ïa palat 250 ngut ki nongshong shnong da kaba plie lad ba kin lah ban ïeng ha la ki kjat bad lah ban thaw ruh ki lad kamai.
La ong ruh ba kawei na ki khana jop na kine ki jinghikai ka dei jong ka Kong Merida Bareh kaba na shnong Mynkre, ka Kong Merida, na ka kam ba shu bylla sngi, ka la kylla long ka Office Assistant ba tbit ha kawei ka bynta treikam lyngba ka jingshim bynta ha ka prokram CS, ka jingtbit ha ka digital literacy, ka jinglah ban pynkhreh bad ki jingnang ha ka kam ym tang ba ka la kyrsoi ïa ka kam jong ka hynrei ka la kyntiew ïa ka longïing jong ka hi.
Haba ai jingkynthoh halor ka jingïaid lynti ka jingim jong ka, ka Kong Merida ka la ong, “Nga dap da ka jingsngewnguh ïa ka Dalmia Bharat Foundation na ka bynta ki lad kiba ka la ai kiba la plie lynti ban pynkylla, nalor ka jingtip ïa ki kor computer bad ïoh ka kam ban trei hi ka la pynkylla ïa ka jingim jong nga, mynta nga la shong kurim bad shong ïing wai ha ryngkat u kurim bad kyrshan ïa ki bahaïing bad u para jong nga”.
Halor ki sienjam ka Company ha ka thaiñ, u Raju Ranjan Prasad, Asst. Executive Director, Dalmia Cement u la ong, “Ha Dalmia Cement, ngi don ka thong ban kyntiew ïa ka longbriew manbriew bad ka imlang sahlang nalor ka ïoh ka kot ha ki sawdong ki shnong ha ka thaiñ ba ngi don ka jingtreikam, ha ka pyrthei stad mynta, ka digital literacy ka la kylla long ka hok ban pyndonkam, ka ai ïa u briew da ki jingtbit ban ïoh ïa ki jingtip, ka jingpyniasoh bad ïa shim bynta ha ka ïoh ka kot jong ka pyrthei baroh kawei, lyngba kine ki prokram, ngi don ka jingthmu ban pynïasoh ïa ki kynhun nongshong shnong ha ki jaka nongkyndong da kaba ai ïa ki jinghikai bad jingshakri da ki digital, ryngkat ka jingaibor ban ïeng halade bad kyntiew ïa ka kamai kajih”.
Ka jingsdang ïa ka World on Wheels (WOW) ka dei ka jingïatreilang hapdeng ka HP Inc bad ka Digital India Initiative ka Sorkar India lyngba ka jingtip halade, ka jingpyndonkam ïa ka bor sngi ha ki digital learning lab kiba la buh ha ki bus, ka prokram ka ai ïa ka digital literacy training, ka jingkyntiew ïa ki kam treikam dalade, ka e-education, bad ka jingïarap ïa ki nongshong shnong ha ki jaka nongkyndong bad ki jaka ba jan sor da kaba pynkup bor ïa ki rangbah, ki kynthei bad ki samla da ki jinghikai pyntbit bad ki jingïarap. Ka prokram Common Service Lab (CSL) ka ai sha ki samla pule ban shim khia ïa ki jingpyntbit ha ka digital bad financial, ka jingpynshlur ïa ki ban shim pyndonkam ïa ki jingstad ka juk mynta bad ban kham ïoh ki lad ïoh kam.
Ki prokram CSL la pynlong ha ki shnong ba kynthup ha ka Wahiajer, Lumshnong bad Moosiang Lamare.
Ka Dalmia Bharat Foundation ka don ka thong ban kyntiew ïa ka imlang sahlang ha ryngkat ka ïoh ka kot ha ki shnong nongkyndong bad ha sawdong ba don ki jaka treikam jong ka ha North East India. Ka Foundation ka la pynlong ïa ki prokram bapher bapher ban hikai pyntbit bad kyntiew ïa ka rukom im ki nongrep, ki longïing bad ki samla, ka rukom ri blang ri masi, ka rep kper bad ki kper soh ha ka thaiñ da kaba shna ruh ïa ki jingtei ha ka thaiñ.