Mawkyrwat, Jylliew 25 : Ka ophis jong u Block Development Office (BDO) jong ka Mawkyrwat C&RD Block mynta ka sngi lyngba ka Block Mission Management Unit, MSRLS (Meghalaya State Rural Livelihood Mission), Mawkyrwat Block ki la pynlong ïa ka Convergence-cum-Enrollment Camp (ne ka jingïasynrop lang) jong ki tnad treikam jong ka sorkar ha ki bynta bapher bapher, ba la pynlong ha shnong Shngimawleiñ, South West Khasi Hills District kaba kynthup ruh ïa ki 6 (hynriew) tylli ki shnong kata ka Pyndenumsaw, ka Pharmahiong, ka Laitnong, ka Shngimawlein, ka Sohma bad ka Nongbrei Nongdom.
Lah ban kdew ba kane ka jingpynlong ïa kane ka program ka dei da ka VC-VEC-VO kaba dei ka kam lyngba ka Block Mission Management Unit, MSRLS (Meghalaya State Rural Livelihood Mission), Mawkyrwat Block (kaba hapoh ka ophis jong u Block Development Officer, Mawkyrwat C&RD Block) bad kum shibynta ruh jong ka jingrakhe ïa ka Janjatiya Gaurav Varsh (JJGV) 2025 (Ka jingrakhe ïa ka snem ba kyrpang ki paid riewlum (ST), ka jingpynkupbor ïa ki paid riewlum ban kyntiew ïa ka ri India) hapoh ka Dharti Aaba Janjatiya Gram Utkarsh Abhiyan (DAJGUA).
Ha kane ka Convergence-cum-Enrollment Camp, na ka liang ki paidbah nongshong shnong ki la ïoh jingmyntoi ha kaba ki la ïoh ban pynrung kyrteng na ka bynta ki jingmyntoi halor ka Adhaar Enrolment, MHIS, ABHA, NSAP, Social Security Schemes – PMJJBY, PMSBY, APY, KCC loans, Jan Dhan Account, PM-KISAN, Caste Certificate, Ration Card, Eshram Card, bad kiwei de. Bad katkum ka jingïoh lum jingkheiñ kiba la wan ha kane ka sngi ki long Aadhar enrolment 70 ngut, MHIS enrolment 80 ngut, E-Shram 60 ngut, NCD Screening 57 ngut, PM KISAN 29 ngut, Old Age Pension 5 ngut, Banking Services: 12 ngut (A/C opening-3; Social Security Schemes- 7 (PMSBY, PMJJBY, APY), ATM, Adhaar seeding).
Ka jingthmu jong kane ka camp ka long ban pynïasoh lang ïa ki tnad treikam jong ka sorkar lem bad ki paidbah jong ki shnong, ban ai jingtip shaphang ki katto katne ki skhim ba la kyrshan da ka sorkar India bad ka sorkar Meghalaya bad ban pynrung kyrteng ïa kum kine ki skhim/hok sha ki dkhot jong ka imlang sahlang na ka bynta ka jingshakri ha ka jaka.
U kongsan ha kane ka sngi u dei u bah D.G. Nongsiej, District School Education Officer (DSEO), South West Khasi Hills District ha kaba u la kren halor ki lai tylli ki mat ba kongsan kiba kynthup ïa ki lad jingïarap ha kaba ïa dei bad ki jaka leit shabar ha ki skul, ka jingbam ja sngi jong ki khynnah skul ne ka Mid-day Meal bad ka Scholarship.
Kiwei de kiba la ïadonlang ki long ka kong R Kharlyngdoh, BPM, MSRLS, Mawkyrwat on VC-CEC-VO Convergence project, BMMU, MSRLS, Mawkyrwat kaba la ai ka jingkren lamphrang, ka kong N. Dkhar kaba la kren halor ka Janjatiya Gaurav Varsh (JJGV) 2025 bad Dharti Aaba Janjatiya Gram Utkarsh Abhiyan (DAJGUA)- IEC Campaign ha ryngkat ka jingai jingpynshai na ki 17 tylli ki tnad treikam jong ka sorkar hapoh ka South West Khasi Hills District.
