Da ka Community Hall tei ka KHADC ha jaka ka Outpost ha Nonglang, Langpih, ong u CEM

Shillong Naitung 10: U CEM ka KHADC u Bah Pynïaid Sing Syiem u la ong ba ka Council ha ka jaka ban shna ïa ka Police Outpost ha Langpih na ka liang ka Council ka la hap ban shna noh da ka Community Hall hapoh Shnong Nonglang ha ka jinglut kaba la mang kumba T. 30 lak kaba la dep ruh ban mang naduh u snem 2020.
Ïa kane la ïathuh da u CEM ka KHADC u Bah Pynïaid Sing Syiem ha ka sngi sdang jong ka Dorbar Lyuir ka KHADC haba jubab ïa ka jingkylli ba la wanrah da u MDC ka Laban -Mawprem konstituensi u Bah Mitchel Wankhar halor ka jinglong jingman ka jingtei ka Police Outpost ha Langpih kaba la mang pisa da ka KHADC.
U Bah Wankhar u la ïathuh ba ha u snem 2020 ka jingthmu ban tei ïa ka Police Outpost ka la shongshit bha hynrei kaei pat ka daw ba ha ka jaka ban shna ïa ka Outpost la pynshna pynban da ka Community Hall.
Haba ïadei bad kane u CEM u la ïathuh ba hadien ba ka Council ka la thmu ban shna ïa ka Outpost ha Langpih ka sorkar jylla ka la pyntip ba ka la thmu ban buh ïa ka Outpost bad namarba ba ka Council ka duna ki Force ne ki bor ai jingïada kumta la mynjur ba ka long kaba biang hi ïa ka sorkar ban buh ïa ka Outpost bad dei halor kane la rai noh ban ai jingïarap ban tei ïa ka Community Hall ha Nonglang ka ban long kum ka lad ba ïajan bad ki nongshong shnong.
“Kumba la leh da ka Assam ka la buh ïa ki pulit kumta ka Council kam lah ban leh kum ka Assam namar ka duna ki force kumta kan bha hi ba peit ïa kane da ka sorkar, hynrei na ka liang ka Council, ka EC kan ïatreilang bad ki paidbah, ka Hima kumta la tei noh da ka community hall bad ka jingpyntrei ïa ka kam ka la ïaid 40-50%,” ong u CEM.
Ha kaba ïadei bad ki lad jingïarap ïa kiba sah ha khappud u CEM u la ong ba khnang ba ka Council kan ym duh ïa ki jaka ha khappud ka la rai ban ym shim bai register jaka ha ki khappud.
“Ha kaba ïadei bad ki jaka hapoh Block 2 ka Council ka la ïakren bad ka Karbi Anglong Autonomous District Council ba kam dei ban pynthut ïa ki jingai skhim ne ki kam pynroi sha ki shnong ba hab hapoh Block 2. Lyngba ka 15th Finance Commission ka Council kan ai ka jingïarap ïa ki 24 tylli ki shnong ha kane ka Block 2,” ïathuh u CEM ha Dorbar Lyuir ka KHADC.