Da ka ‘Academic Excellence Award’ shah pynkup burom ki samla pule ka Mawlai ha u Lamphang ka ïingDorbar thaw aiñ bad MLA
Shillong, Nailar : Kum shi bynta ban ai mynsiem bad pynshlur ïa ki samla pule kiba pass bha hapoh Mawlai constituency, ha ka sngi Saitjain saitjain ba la lah ki la don haduh 105 ngut ki samla pule kiba la pass bha kiba la shah pynkup burom da ka Academic Excellence Award 2022 ha u Lamphang ka Iing dorbar thaw aiñ u Bah Metbah Lyngdoh kum u kongsan, u Bah P.T. Sawkmie, MLA nangta ki nongïalam ka UDP Mawlai Circle bad kiwei kiwei ha ka jingïalang kaba la long hapoh Mawlai Parish Hall, Phudmuri.
Ha katei ka sngi ki khynnah kiba pass bha ha ka SSLC, HSSLC jong ka MBOSE, Indian Certificate of Secondary Education (ICSE), Central Board of Secondary Education (CBSE) bad ka Indian School Certificate (ISC) ki la ïoh pdiang ïa ki syrnot bad ki song pisa.
La pynshongshit ruh ïa kane ka sngi da ki jingrwai na u bah Banker Kharkongor, na ki khynnah Sacred Heart Girls, Om Roy HSS, Christ Church HSS, Mawlai bad Phudmuri Presbyterian HSS, Mawlai.
Haba ai jingkren ha kane ka sngi u Bah Metbah Lyngdoh u la ai khublei kyrpang ïa u MLA Mawlai ba la khot sngewbha ïa u sha kane ka jingpynkup burom. U pynpaw ba kane ka dang dei tang ka sienjam kaba sdang na ka bynta ki samla pule kiba la shah pynkup burom.
“Teng teng ki samla ki jop bad teng teng ki ïoh jinghikai ha jingïaid lynti jong ki ha ka pule puthi bad ba kim dei ban duh jingkyrmen ha kane ka jingïaid lynti jong ki,” ai mynsiem u bah Metbah.
Na ka liang u bah P.T Sawkmie ula pynpaw ka jingsngewkmen haba ïohi ba ki don ki samla Khasi Jaiñtia kiba pass IAS bad long IAS ophisar bad ka jingthrang jong hi u ka long ban ïohi ïa la ki jong ki jaidbynriew ba kin synshar ïa ka secretariat.
“Ha secretariat la synshar da ki IAS ophisar, nga sngewkhia haba ïohi ïa ka jinglong jingman bad kaei kaba jia ha ka jylla ha kine ki sngi,” ong u bah P.T Sawkmie.
Nalor kata u la bynrap da ka ba ong, “Haba nga peit ïa ki nonghikai FASTOM, ki nonghikai kontrak bad kiwei ki nonghikai kiba mih sha surok ban ïakhih, nga dap shisha da ka jingsngewkhia.”
Ha kane ka sngi la ïoh ruh ïa ka jingkren na u Bah Homer Kharkongor, President UDP Mawlai Circle, na ka principal Christ Church HSS ka Kong I Nengnong bad kiwei kiwei.Ha kane ka prokram pynkup burom la don lang ruh ki nongïalam ka KSU, FKJGP, HYC jong ka Mawlai Circle, kiba la ïoh byntalang ban pynkup burom da ka jingsam syrnot bad song pisa sha ki samla.